Xəbərlər
Britaniyanın Baş naziri gizli səfər edib: Sülh sazişi imzalana bilər
Böyük Britaniyanın Baş naziri Kir Starmer Ukraynaya ilk dəfə gizli səfər edib.
Crossmedia.az bu barədə "The Telegraph" qəzetinə istinadən xəbər verir.
Nəşrin yazdığına görə, bu səfərlə əlaqədar Böyük Britaniya və Fransa, ehtimal olunan sülh sazişinin bağlanması halında, öz əsgərlərini Ukraynaya sülhməramlı qüvvələr kimi göndərməyi gizli şəkildə müzakirə edirlər.
Bundan əlavə, qəzet Britaniya qüvvələrinin Ukraynada yerləşdirilməsi üçün 3 mümkün ssenari təklif edir:
1. Britaniya qoşunları bufer zonası boyunca nəzarət məntəqələri yaradır. Bu zonada qırıcı təyyarələr və zərbə helikopterləri patrul xidməti edir. Arxa cəbhədə sürətli reaksiya qüvvələri, üçüncü eşelonda isə zirehli texnika mümkün hücumu dəf etməyə hazır olur;
2. Qərb Kiyev ətrafında müdafiə xətti yaradır. Bu, Ukrayna Silahlı Qüvvələrinə rus qoşunlarını dayandırmağa fokuslanmağa imkan verir;
3. Britaniya təlimatçıları Ukraynanın qərbində hərbi təlimlər keçir. Polşadan göndərilən hava hücumundan müdafiə sistemləri isə onların təhlükəsizliyini təmin edir.
Qeyd olunur ki, sülhməramlı kontingentin yaradılması ilə böyük ehtimalla, Böyük Britaniya və Fransa məşğul olacaq.
Gültac Mehdizadə
10:43 16.01.2025
Oxunuş sayı: 1971
