Duda: “Ukrayna üçün təhlükəsizliyə dair düşünülməmiş qərarlar olmayacaq”
Polşa Prezidenti Andjey Duda, ABŞ-ın yeni seçilmiş Prezidenti Donald Trampın Ukrayna ilə bağlı təhlükəsizlik məsələlərinə sakit və əsaslı yanaşdığını bildirib.
Crossmedia.az xəbər verir ki, Duda bu fikirləri Varşavada Ukrayna Prezidenti Vladimir Zelenski ilə birgə keçirdiyi mətbuat konfransında səsləndirib.
O qeyd edib ki, artıq bir neçə dəfə Tramp ilə Ukrayna mövzusunda danışıb və Tramp Rusiya müdaxiləsinə son qoymaq və Ukraynanın müstəqil dövlət kimi təhlükəsizliyini təmin etmək üçün real imkanları nəzərdən keçirir.
“Trampın düşünülməmiş qərarlar verəcəyinə inanmaq üçün əsas yoxdur. Əks halda, belə qərarlar artıq məlum olardı. Məncə, Prezident Trampın əsas prioriteti Ukraynanın müstəqilliyinin və təhlükəsizliyinin qorunmasıdır,” – deyə Duda bildirib.
Duda həmçinin Trampın ilk prezidentliyi dövründə dörd il ərzində onunla qlobal təhlükəsizlik məsələlərində əməkdaşlıq etdiyini vurğulayıb.
Polşa lideri qeyd edib ki, Tramp daim Ukraynadakı vəziyyətlə bağlı onun fikirlərini öyrənir. O, Trampın ikinci prezidentliyi dövründə də bu əməkdaşlığın davam edəcəyinə əmin olduğunu bildirib.
Duda əlavə edib ki, Ukraynanın təhlükəsizliyinin ən böyük təminatı onun NATO-ya üzvlüyü olacaq. O, müharibə bitmədən tamhüquqlu üzvlüyün mümkün olmadığını qəbul etsə də, Polşanın Ukraynanın alyansa dəvət edilməsi üçün israrla çalışdığını vurğulayıb.
Gültac Mehdizadə
19:31 15.01.2025
Oxunuş sayı: 2715
