Ötən il televiziya və radio efirində pozuntu faktları aşkarlanıb
Ümumilikdə, aparılmış monitorinqlər nəticəsində audiovizual yayımçıların həm televiziya, həm radio redaksiyalarının efirində ümumi olaraq 358 pozuntu faktı qeydə alınıb.
Crossmedia.az xəbər verir ki, bu barədə Audiovizual Şura məlumat yayıb.
Bildirilib ki, həmin pozuntuların çox bir hissəsi (348 fakt) texniki səbəbdən olduğundan yayımçılara zəruri bildirişlər verilmiş və pozuntuların aradan qaldırılması təmin olunub. Bir sıra pozuntulara görə yayımçılara il ərzində 3 dəfə xəbərdarlıq elan olunmuş və mediada dərc olunub. Pozuntular səbəbi ilə il ərzində 4 dəfə yayımın dayandırılması sanksiyası tətbiq olunmuş, 3 dəfə inzibati cərimənin tətbiq olunması ilə bağlı protokol tərtib olunaraq müvafiq məhkəməyə göndərilib.
Qeyd edilib ki, ən çox pozuntu "Reklam haqqında" Qanunun tələblərinə riayət olunmaması (270 fakt, ümumi pozuntuların 75%-i) ilə bağlı olmuşdur. "Media haqqında" Qanunun tələblərinin pozulmasına 65 dəfə (ümumi pozuntuların 18%-i), "Uşaqların zərərli informasiyadan qorunması haqqında" Qanunun pozulmasına 17 dəfə (ümumi pozuntuların 5%-i), digər qanunvericilik tələblərinin pozulmasına 6 dəfə rast gəlinib.
"Reklam haqqında" Qanunun ən çox pozulan tələbləri sırasına lisenziyalı mal və xidmətlərin reklamı zamanı həmin lisenziya məlumatlarının təqdim olunmaması (70 fakt), bir saat ərzində icazə verilən reklam həcminin aşılması (49 fakt), reklamın və teleticarətin təqdim olunması ilə bağlı tələblərin pozulması (43 fakt), sponsor reklamı (təqdimatları) ilə bağlı müddəaların pozulması (35 fakt), gizli reklama yol verilməsi (33 fakt), dərman vasitələrinin və bioloji qida əlavələrinin reklamı ilə bağlı tələblərin pozulması (11 fakt) faktları yer alıb.
"Media haqqında" Qanunun ən çox pozulan tələbləri sırasında isə mediada yayımlanan informasiya ilə bağlı tələblərin pozulması (25 fakt), Dövlət Himninin səsləndirilməməsi ilə bağlı faktlar (18 fakt), yerüstü yayımçının dövlət dilində yayım aparması tələbinin pozulması ilə bağlı faktların (9 fakt) olduğu bildirilib.
11:24 15.01.2025
Oxunuş sayı: 20382
