Qazaxıstan və Çin razılaşdı: daşımaların həcmi artırılsın
Qazaxıstan və Çin arasında daşımaların həcmi artırılacaq.
Crossmedia.az xarici KİV-ə istinadən xəbər verir ki, Qazaxıstan Dəmir Yollarının törəmə şirkəti olan KTZ Express və Çinin Yixinou Trading Service Group Co. Ltd nümayəndələri Transxəzər Beynəlxalq Nəqliyyat marşrutu boyunca konteyner daşımalarının inkişaf perspektivlərini müzakirə ediblər:
"Qazaxstanın paytaxtı Astana şəhərində KTZ Express rəhbərliyi ilə Yixinou nümayəndələri arasında görüş keçirilib.
Görüşün əsas mövzusu Avropa İttifaqı ölkələrinə, Mərkəzi Asiyaya və TMTM boyunca konteyner daşımalarının inkişaf perspektivləri olub".
Məlumata görə, xüsusi diqqət Çinin strateji mövqeyə və inkişaf etmiş nəqliyyat infrastrukturuna malik Zhejiang əyalətindən daşımaların həcminin artırılmasına yönəlib. Bu əyalət beynəlxalq logistika və ticarət üçün əsas mərkəz hesab edilir:
"Danışıqlar nəticəsində strateji əməkdaşlıq haqqında saziş imzalanıb. Sənəd konteyner daşımalarının həcmini artırmaq və əsas marşrutları inkişaf etdirmək üçün birgə təşəbbüslərin həyata keçirilməsini nəzərdə tutur".
Qeyd edək ki, Yixinou, Çin-Avropa marşrutu üzrə konteyner qatarı logistika platformasının yeganə özəl operatorudur.
Fatimə Məmmədova
13:40 14.01.2025
Oxunuş sayı: 3647
