İran və Avropa anlaşdı: dialoq davam edəcək
İran və Avropa ölkələri nüvə proqramı ilə bağlı danışıqları davam etdirəcək.
Crossmedia.az bu barədə İranın rəsmi xəbər agentliyinə istinadən xəbər verib.
Qeyd olunub ki, İran, Britaniya, Fransa və Almaniya arasında Cenevrədə keçirilən danışıqlar Tehranın mübahisəli nüvə proqramı ilə bağlı dialoqun davam etdirilməsinə zəmin yaradıb.
İranın beynəlxalq və hüquqi məsələlər üzrə müavini Kazım Qəribabadi bazar ertəsi X platformasında yazıb: "Danışıqlar ciddi, açıq və konstruktiv keçdi. Müqavilə üçün zəruri olan bəzi sanksiyaların ləğvi və nüvə sahələrinə dair ideyaları müzakirə etdik."
O, həmçinin əlavə edib ki, tərəflər danışıqların bərpa olunması və razılaşmaya nail olunması üçün müvafiq mühitin yaradılması və onunqorunub saxlanılması ilə bağlı razılığa gəliblər: “Biz dialoqumuzu davam etdirməyə razılaşdıq."
Bazar ertəsi keçirilən bu danışıqlar noyabrda aparılmış müzakirələrdən sonra baş tutub. Həmin vaxt İran rəsmisi Böyük Britaniyanın “Röyters” agentliyinə bildirmişdi ki, avropalılarla yol xəritəsinin yekunlaşdırılması nüvə sazişini dirçəltmək və ya dayandırmaq üçün topu ABŞ-nin meydançasına ötürəcək.
Nabat Fərzəliyeva
08:50 14.01.2025
Oxunuş sayı: 6520
