Trampın hakimiyyəti ilə Rusiya-Ukrayna danışıqları başlaya bilər
Rusiya və Ukrayna arasında sülh danışıqları ABŞ-ın seçilmiş prezidenti Donald Tramp hakimiyyətə gəldikdən sonra başlaya bilər.
Crossmedia.az xəbər verir ki, bu fikri TASS-a müsahibəsində Niderlandın “Demokratiya Forumu” partiyasının üzvü və keçmiş senator Pol Klitör səsləndirib.
Onun sözlərinə görə, Tramp artıq sülh danışıqlarına meylli olduğunu bildirib. “Münaqişənin 24 saat ərzində həll edilə biləcəyinə dair onun bəyanatları bəlkə də şişirdilib, lakin ümumilikdə Tramp dialoqu təşəbbüs edə bilər”, – deyə ekspert vurğulayıb. “O, biznesmendir və razılaşma əldə edə bilər”, – Klitör əlavə edib.
Razılaşmanın dəqiq məzmunu barədə fikir söyləməkdə çətinlik çəkən keçmiş senator hesab edir ki, əldə ediləcək razılaşmalar çərçivəsində Ukraynanın Avropa İttifaqına və ya NATO-ya üzv olması ehtimalı azdır. “Qərb dövlətləri və ümumilikdə NATO Ukraynanın neytral bir bufer dövləti olmasına razılaşmalıdır”, – deyə Klitör qeyd edib.
O əlavə edib ki, üçüncü dünya müharibəsi riski böyükdür. “Bu risk azaldılmalıdır və buna görə də danışıqlar indi son dərəcə vacibdir”, – deyə ekspert vurğulayıb.
Gültac Mehdizadə
17:05 12.01.2025
Oxunuş sayı: 2504
