Türkiyə ordusu dünyanın ən güclü 9-cu ordusu elan edilib
ABŞ mərkəzli Global Firepower şirkəti 2025-ci il üçün "Dünyanın Ən Güclü Orduları" siyahısını açıqlayıb. Reytinqdə ilk üç yeri ABŞ, Rusiya və Çin bölüşdürüb. Crossmedia.az xəbər verir ki, ilk onluqda Hindistan, Yaponiya, Fransa, Böyük Britaniya, Cənubi Koreya və Türkiyə də yer alıb. Türkiyə ordusu dünyanın ən güclü 9-cu ordusu olaraq bu siyahıda öz mövqeyini tutub.
NATO çərçivəsində Türkiyə ordusu ABŞ-dan sonra ikinci ən böyük hərbi qüvvəyə malikdir. Müasir texnologiyalara əsaslanan yerli müdafiə sənayesinin inkişafı, hərbi modernizasiya və strateji layihələr Türkiyənin hərbi gücünü əhəmiyyətli dərəcədə artırıb. Son illərdə istehsal olunan milli silah sistemləri, pilotsuz uçuş aparatları və zirehli texnika, ordunun döyüş qabiliyyətini daha da artırıb.
Bununla belə, siyahının obyektivliyi bəzi müzakirələrə səbəb olur. Türkiyə ordusunun yalnız texnoloji imkanlarla deyil, həm də əsgərlərinin cəsarəti, vətənpərvərliyi və peşəkarlığı ilə tanındığı bir reallıqdır. Türkiyə tarixi boyunca müstəqilliyini və ərazi bütövlüyünü qorumaq üçün göstərdiyi fədakarlıqla seçilən bir ölkədir. Hərbçilərin yüksək döyüş əzmi, intizamı və taktiki bacarığı Türk ordusunun qlobal səviyyədə daha yüksək mövqelərə layiq olduğunu göstərir.
Türkiyənin müdafiə sənayesinə və ordusuna qoyduğu sərmayə, gələcək illərdə bu mövqeyin daha da yüksələcəyini göstərir. Hərbi gücü ilə yanaşı, Türk əsgərinin döyüş ruhu və xalqın dəstəyi, Türkiyə ordusunun yalnız silahlanma baxımından deyil, həm də mənəvi güc olaraq ön sırada yer aldığını bir daha sübut edir.
Qeyd etmək lazımdır ki, Global Firepower kimi təşkilatların hazırladığı reytinqlər müxtəlif kriteriyalara əsaslanır və obyektivlik səviyyəsi müzakirə mövzusu ola bilər. Hərbi gücün tam qiymətləndirilməsi üçün həm texniki, həm də mənəvi amillərin birlikdə nəzərə alınması vacibdir.
Nihat Tahirov
11:33 12.01.2025
Oxunuş sayı: 7127
