Myanmada hərbi hava hücumu: Onlarla insan həlak olub
Myanmanın hərbi hökuməti bu həftə Qərbi Raxin ştatında hava hücumu həyata keçirib.
Crossmedia.az "Reuters"ə istinadən xəbər verir ki, Birləşmiş Millətlər Təşkilatının (BMT) məlumatına görə, hücum nəticəsində onlarla insan həyatını itirib. Cənub-Şərqi Asiya ölkəsində vətəndaş müharibəsi dördüncü ilinə yaxınlaşarkən, bu hücum vəziyyəti daha da gərginləşdirib.
Milli Vahidlik Hökuməti (NUG) və Raxin bölgəsinin muxtariyyəti uğrunda mübarizə aparan Arakan Ordusu da hücumun nəticəsində onlarla insanın öldüyünü bildirib. Çərşənbə günü Yanbye rayonundakı Kyauk Ni Maw kəndinə edilən hava hücumu 500-ə yaxın evi məhv edib, 40-dan çox insanın həyatına son qoyub.
Arakan ordusu hücumda öldürülən 26 müsəlman kəndlinin adlarını və 12 nəfərin yaralandığını açıqlayıb. Reuters, məlumatların müstəqil şəkildə təsdiqlənə bilmədiyini qeyd edib. Hərbi hökumət isə məsələ ilə bağlı suallara cavab verməyib və mülki şəxslərə qarşı vəhşilik ittihamlarını rədd edərək, “terrorçulara” qarşı mübarizə apardıqlarını iddia edib.
Fidan Hacızadə
13:49 11.01.2025
Oxunuş sayı: 3847
