İsrailə qarşı döyüşmək istəyən şəxslər həbs edildi
Sinqapur, ötən ilin oktyabr ayından bəri İsrailə qarşı döyüşmək üçün Orta Şərqə getməyə hazırlaşan üç nəfəri saxladığını açıqlayıb. Onlardan biri, göstəriş verildiyi halda Sinqapurda hücumlar həyata keçirməyə hazır olduğunu bildirib.
Bu barədə Crossmedia.az “The Times of Israel”ə istinadən xəbər yayıb. Daxili İşlər Nazirliyinin açıqlamasında qeyd olunur ki, saxlanılan üç Sinqapur vətəndaşı bir-biri ilə əlaqəli deyillər və onlayn radikallaşıblar. Lakin onların başqalarını cəlb etdiyinə dair heç bir işarə yoxdur.
Nazirliyin həbsləri niyə məhz indi açıqladığı hələ ki, aydın deyil. Həbs olunduqdan sonra, həmin şəxslər Sinqapurun Daxili Təhlükəsizlik Aktı əsasında saxlanılıb. Bu qanun şübhəlilərin məhkəməsiz uzun müddət həbsdə saxlanılmasına imkan verir.
Saxlanılan şəxslərdən biri rəqəmsal marketinq şirkətinin direktoru , biri lift mexaniki ,digəri isə mühafizəçi olub.
Nazirliyin açıqlamasına görə, saxlanılanlardan biri İranın Ali Rəhbəri Ayətullah Əli Xameneyidən göstəriş verildiyi halda, o cümlədən Sinqapurda hücumlar həyata keçirməyə hazır olduğunu deyib. Bununla belə, həmin şəxsin konkret hücum planları olmadığı bildirilir.
Nazirlik əlavə edib ki, keçən ilin iyun və iyul aylarında Qəzza münaqişəsi ilə bağlı təhlükəsizlik qanunu çərçivəsində daha iki Sinqapur vətəndaşına məhdudiyyətlər qoyulub.
Nərgiz Camalzadə
16:05 09.01.2025
Oxunuş sayı: 4100
