Çində bir neçə nəfər yeni növ meymun çiçəyi virusuna yoluxub
Çində bir neçə meymun çiçəyi virusuna yoluxma halı qeydə alınıb.
Crossmedia.az "TASS"a istinadən xəbər verir ki, bu barədə Çin Xəstəliklərə Nəzarət və Profilaktika Mərkəzi məlumat yayıb.
Məlumata görə, insanlar yeni növ “lb” virusuna yoluxub və xəstəliyin yayılmasının qarşısı alınıb.
Yoluxmanın mənbəyi Konqodan gələn xarici vətəndaş hesab olunur. Xəstəliyin aşkar edilməsindən sonra müvafiq qurumlar Çjetszyan və Quandun əyalətlərində, eləcə də Tyançzin və Pekin şəhərlərində profilaktika və nəzarət mexanizmini işə salıblar. Meymun çiçəyi virusuna xarici vətəndaşla yaxın təmasda olan dörd nəfər yoluxub. Xəstələrdə yüngül simptomlar, o cümlədən səpgilər və herpes müşahidə olunub. Hazırda onlar həkimlərin nəzarəti altındadır və tibbi yardım alırlar.
Meymun çiçəyi virusunun “lb” növü ilk dəfə 2024-cü ilin aprelində Konqoda aşkar edilib. Xəstəlik ölkənin şərq bölgələrində və qonşu dövlətlərdə – Ruanda, Keniya, Burundi, Uqanda, Zimbabve və Zambiyada yayılıb.
Keçən ilin oktyabr ayının əvvəlində Qana Milli Səhiyyə Xidməti meymun çiçəyi epidemiyası fonunda ölkə vətəndaşlarını cinsi əlaqədən və öpüşdən çəkinməyə çağırmışdı. Bu xəbərdarlıq Şimal-Qərb bölgəsində yeni yoluxma halı aşkar edildikdən sonra edilmişdi.
Gültac Mehdizadə
14:14 09.01.2025
Oxunuş sayı: 4028
