Avropa

Rusiyaya qarşı sanksiyalar sərtləşdirilir – Moskva təslim olacaqmı?

Rusiya-Ukrayna müharibəsi davam edir və Ukraynanı güclü silahları ilə silkələyən Rusiya özü bu dəfə ABŞ-nin yeni sanksiyalarına məruz qaldı. Belə ki, ABŞ Rusiya nefti daşıyan tankerlərə qarşı sanksiyaları gücləndirməyi planlaşdırır. Ukraynaya dəstəyini sərgiləyən ABŞ prezidenti Co Baydenin administrasiyası isə kürsülərini təhvil verənə yaxın bu tip addımlar sərgiləməsi ilə xüsusi diqqət çəkirlər. Sanksiyaların tətbiqi Rusiya üçün heç də yeni deyil, lakin ABŞ-da baş verənlər və Rusiya-Ukrayna müharibəsinin diplomatik həllərdə qərarlaşmadığı bir zamanda sözügedən proseslər ölkənin, müharibənin taleyi ilə bağlı maraq doğurur.

Mövzu ilə bağlı politoloq Sultan Zahidov Crossmedia.az-a açıqlamasında qeyd edib ki, hələ indiyə qədər heç bir ölkə sanksiyalara görə müharibədən yayınmayıb:

"Sanksiyalar ölkəni müəyyən qədər zəiflədir, lakin geniş resurslara sahib olan ölkə üçün bunların təsiri zəifdir. Biz bunu 1990-cı illər zamanı İraqın timsalında gördük. Belə ki, qarşı tərəfin - ABŞ-nin təsirsiz ötüşən sanksiyalara cavab olaraq, ordusunu yeritməsi öz sözünü deyir. Eyni şəkildə də bu Rusiyaya aid ediləndir. Krımın işğalından bəri Rusiyaya bir sıra sanksiyalar tətbiq olunur. Lakin o, öz ritorikasından əl çəkmir. Çünki ölkə qarşısında bir məqsəd var və ölkənin milli maraqları üçün Ukrayna təhdid rolunu oynayır. Digər tərəfdən, Rusiya zəngin resurslar və onları sata biləcəyi bazarlara sahibdir. Bunlar isə öz növbəsində, ölkənin sanksiyalar nəticəsində gözlənilən qədər zəifləməsinə mane olur".

ABŞ-nin sərgilədiyi mövqeyə gəlincə isə politoloq əlavə edib ki, ölkədə hakimiyyət dəyişiklikliyinin tam qərarlaşmasına az müddət qaldığı bir zamanda Demokratların bu addımı, onların son anda hakimiyyətdə möhür vurmaq istədiklərini deməyə əsas verir. Lakin bu möhürün effektiv olacağı gözlənilən deyil.

Mövzu ilə bağlı iqtisadçı ekspert Eldəniz Əmirov da fikirlərini qeyd edib. O bildirib ki, Rusiya tankerlərinə tətbiq edilən bu sanksiya ilk deyil:

"Müharibə başlayan dövrdən Rusiya neftinə tətbiq edilən sanksiyalar zamanı neft daşınması ilə məşğul olan bir sıra şirkətlər, bunun nəticələrindən yayınmaq üçün müxtəlif üsullardan istifadə edirdilər. Bunun qarşısını almaqdan ötrü isə artıq mərhələli şəkildə müəyyən sanksiya paketləri olub ki, bu tip ixraca öz təsirlərini göstərib. İndi də bir qədər sözügedən proses dərinləşdirilib və Rusiyaya mərhələli şəkildə tətbiq edilən sanksiyalar, öz nəticəsini dərhal olmasa da, tədricən göstərəcək. Neft qiymətlərinə isə təsiri gözlənilən deyil".