İran paytaxtını köçürür: Tehran niyə tərk edildi?
Tehranda davam edən əhali artımı elektrik enerjisi və su qıtlığı ilə mübarizəyə yönəlmiş plan çərçivəsində paytaxt cənub sahilindəki Makran əyalətinə köçürüləcək.
Crossmedia.az xarici KİV-ə istinadən xəbər verir ki, rəsmilər bu dəyişikliyin strateji və iqtisadi üstünlüklərini vurğulayıblar. Ancaq tənqidçilər bu mövzuda olan potensial böyük maliyyə və maddi-texniki tələblərlə bağlı narahatlıqlarını dilə gətiriblər.
Hökumət sözçüsü Fatemeh Mohajerani "Yeni paytaxt mütləq cənubda, Makran bölgəsində olacaq. Hazırda bu mövzu üzərində işlər aparılır" dedi.
Tehranın artan ekoloji təzyiqlərinə, o cümlədən su qıtlığına diqqət çəkən Mohajerani, Makran bölgəsində köçürülmənin mümkünlüyünü öyrənmək və dəniz əsaslı iqtisadiyyatı inkişaf etdirmək üçün iki şura yaradıldığını və mühəndis, sosioloq və ekonomistlərdən kömək istədiyini bildirib. Əlavə olaraq, mövzunun hələ araşdırıldığını və təcili olmadığını qeyd edib.
Prezident Məsud Pezeşkian paytaxtın yeri ilə bağlı müzakirələri yenidən alovlandıraraq Tehranın maliyyə resursları və xərcləri arasındakı balanssızlığı qeyri-davamlı adlandırıb.
Keçən həftə Fars körfəzinə yaxın ərazilərə köçmək məsələsini müdafiə edən Pezeşkian " Xammalların cənubdan mərkəzə daşımaq, emal etmək və ixracat üçün cənuba geri qaytarmaq rəqabət gücümüzü azaldır" - demişdi.
Qeyd edək ki, İranın paytaxtının köçürülməsi ilə bağlı müzakirələr 1979-cu il İslam İnqilabından bəri davam edir, lakin maliyyə məhdudiyyətləri, siyasi ətalət və maddi-texniki çətinliklər səbəbindən dəfələrlə təxirə salınıb.
Tərəfdarlar Makranın strateji mövqeyinə və potensial iqtisadi faydalarına işarə etsələr də, tənqidçilər bu addımın Tehranın iqtisadiyyatını poza biləcəyini və tamamlanması üçün onilliklər çəkə biləcəyini iddia edirlər.
Tərlan Əmrahova
15:14 08.01.2025
Oxunuş sayı: 4224
