Ümumdünya Səhiyyə Təşkilatı: Tənəffüs yolu infeksiyalarında artım müşahidə edilir
Ümumdünya Səhiyyə Təşkilatının (ÜST) sözçüsü Marqaret Harris Çində müşahidə edilən tənəffüs yolu xəstəliklərinin qış mövsümü üçün adi səviyyədə olduğunu bildirib.
Crossmedia.az xarici mətbuata istinadən xəbər verir ki, BMT-nin Cenevrə ofisində keçirilən həftəlik mətbuat konfransında danışan Harris, Çində müşahidə edilən tənəffüs yolu viruslarına, xüsusən də insan metapnömovirusu (HMPV) hallarına mediada böyük maraq göstərildiyini qeyd edib. O, Çin Xəstəliklərə Nəzarət və Qarşısının Alınması Mərkəzinin hesabatında qış aylarında gözlənildiyi kimi tənəffüs yolu infeksiyalarında artım müşahidə edildiyini vurğulayıb.
Harris, Çində qripə bənzər xəstəliklər və kəskin tənəffüs yolu infeksiyaları üçün bir nəzarət sistemi olduğunu xatırladaraq, “Çin Xəstəliklərə Nəzarət və Qarşısının Alınması Mərkəzinin məlumatlarına görə, bu infeksiyalara səbəb olan patogenlər məlumdur. Bunlar arasında mövsümi qrip virusu, tənəffüs sinsitial virusu (RSV), HMPV və COVID-19-a səbəb olan virus var”, - deyə bildirib.
Harris qeyd edib ki, Çində ən çox rast gəlinən patogen mövsümi qripdir və bu hal artmaqdadır. O, keçən ilin sonunda simptom göstərən şəxslər arasında qrip üçün pozitiv test faizinin 30%-dən çox olduğunu vurğulayıb.
Harris, ÜST-ün Qlobal Qrip Nəzarəti və Cavab Sistemi çərçivəsində Asiya, Avropa, Afrika və Karib hövzəsindəki bəzi ölkələrdə qrip hallarının artdığını da qeyd edib.
HMPV-nin yeni bir virus olmadığını, ilk dəfə 2001-ci ildə aşkar edildiyini və adətən qış və yaz aylarında yayıldığını xatırladan Harris, virusun yayılmasının qarşısını almaq üçün sadə tədbirlərin effektiv ola biləcəyini vurğulayıb. O, yaşlılar və immun sistemi zəif olan şəxslərin daha yüksək risk altında olduğunu və xəstəlik simptomları hiss etdikləri təqdirdə tibbi yardım almalarının vacibliyini qeyd edib.
Fidan Hacızadə
13:37 07.01.2025
Oxunuş sayı: 7237
