Rusiya-Ukrayna müharibəsi 2025-ci ildə bitəcək? - Tərəflər şərtləri qəbul etmir
Rusiya-Ukrayna müharibəsi davam edir və son günlərdə cəbhədə mühüm hadisələr qeydə alınır. Ukrayna ordusu Kursk vilayətində bir neçə istiqamətdə əks-hücum əməliyyatlarına başlayıb. Eyni zamanda, yanvar ayında Ukraynanın “Mirage” qırıcılarının ilk partiyasını alacağı bildirilir.
Bəzi mənbələr Ukraynanın hərbi ehtiyatlarının tükəndiyi və təslim olma ehtimalının artdığı barədə məlumatlar yaysa da, rəsmi mənbələr bu iddiaları təkzib edir. Əksinə, bəzi bölgələrdə geri çəkilmələr olsa da, Ukrayna ordusu ümumilikdə müqavimətini davam etdirir və yeni hərbi texnika ilə güclənir.
Ukrayna Prezidenti Volodimir Zelenski atəşkəs üçün müəyyən şərtlər irəli sürüb, lakin hələlik tərəflər arasında rəsmi razılıq əldə edilməyib. Müharibənin gedişatı dinamik olaraq dəyişir və hər iki tərəf müxtəlif strateji addımlar atır.
Crossmedia.az-a açıqlama verən hərbi ekspert Elxan Şıxəliyev bildirib ki, Rusiya-Ukrayna müharibəsi hazırda ən gərgin fazasını yaşayır. “Səbəb, ABŞ-ın bu müharibədə daha aktiv rol oynamağa çalışmasıdır. Xüsusilə Trampın prezidentliyi dövründə verilən bəzi vədlər və bu vədlərin yerinə yetirilmə müddəti müharibənin dayandırılması məsələsini gündəmə gətirir. Müharibənin dayandırılması yalnız döyüş meydanında deyil, masa arxasında da müzakirə edilməlidir. Bunun üçün tərəflərin güclü şəkildə danışıqlara oturması vacibdir".
Hərbi ekspert qeyd edir ki, son zamanlar döyüş meydanında baş verənlər masadakı danışıqlarda üstünlük qazanmaq məqsədinə xidmət edir. “Ukrayna Kursk istiqamətində irəliləyərək yeni əraziləri nəzarətə götürməyə çalışır, eyni zamanda Avropa da Ukrayna ərazisindəki mövqelərini gücləndirir. Bu, hər iki tərəfin maksimum gücünü istifadə etməyə çalışdığı bir vəziyyətdir ki, danışıqlarda üstünlük qazana bilsinlər. Ukrayna hesab edir ki, Kurskda nə qədər çox ərazi nəzarətə götürsə, bu əraziləri danışıqlar zamanı dəyişdirmək fondu üçün istifadə edə bilər".
O vurğulayıb ki, hər iki tərəf, xüsusilə Ukraynanı dəstəkləyən güclər, sonuncu mərhələdə Ukraynaya maksimum yardım etməyə çalışacaq ki, Rusiya qalib kimi görünməsin. “Rusiya isə öz məqsədlərini reallaşdırmağa, Ukraynanı güzəştə məcbur etməyə çalışır. Müharibənin əvvəlində Ukraynanı dəstəkləyən qüvvələr, Rusiyanın strateji məğlubiyyətə uğrayacağını düşünürdülər, lakin zamanla bunun reallaşmadığını gördülər. NATO və digər beynəlxalq təşkilatların rəhbərləri, müharibənin Ukraynanın lehinə dəyişməsinin reallıq olmadığını anladılar".
Elxan Şıxəliyevin sözlərinə görə, tərəflər ABŞ-ın yeni prezidentinin müharibənin dayandırılması ilə bağlı qərarını gözləyir. “Hər iki tərəf, ABŞ-ın təsirini nəzərə alaraq, danışıqların əsasını necə formalaşdıracağını düşünür. Ukraynanı necə güzəştə getməyə məcbur etmək, Rusiyanın nə qədər əraziyə nəzarət etməsi və ya geri çəkməsi məsələləri müzakirə olunur. Tramp hər iki tərəfi razılığa gətirmək üçün müəyyən şərtləri təklif edə bilər. Əks halda, Ukrayna dəstəksiz qala bilər və ya Rusiyaya qarşı yeni dəstək dalğası ilə müharibə yeni fazaya keçə bilər".
Hərbi ekspert əlavə edib ki, 2025-ci ildə müharibənin dayanması ehtimalı olsa da, tərəflərin şərtləri qəbul etməsi və hansı dəyişikliklərin baş verəcəyi hələ də müzakirə mövzusudur.
Maral Şahverdili
12:37 07.01.2025
Oxunuş sayı: 67228
