ABŞ-dən hərbi aviasiyada böyük addım – 7 milyard dollarlıq sərmayə
ABŞ Müdafiə Nazirliyi ilə “Lockheed Martin” şirkəti növbəti 10 il ərzində ən azı 850 ədəd F-35 döyüş təyyarəsinin istehsalına dair ilkin razılığa gəlib.
Crossmedia.az xəbər verir ki, “Lockheed Martin” şirkəti bu barədə məlumat yayıb.
Razılaşmaya əsasən, şirkət F-35 qırıcılarının istehsalını və texniki təminatını dəstəkləmək üçün öz vəsaiti hesabına ən azı 7 milyard ABŞ dolları investisiya yatıracaq.
Layihə çərçivəsində illik istehsal həcminin 156 təyyarə səviyyəsində saxlanılması nəzərdə tutulur.
Razılaşma ABŞ-ın hərbi ehtiyacları ilə yanaşı, beynəlxalq sifarişləri də əhatə edir. Əsas məqsəd istehsal xərclərini azaltmaq, təchizat zəncirindəki problemləri aradan qaldırmaq və döyüş təyyarələrinin istehsalını daha səmərəli təşkil etməkdir.
Bununla yanaşı, razılaşma hələlik rəsmi satınalma sifarişi hesab edilmir. Onun həyata keçirilməsi ABŞ Konqresinin müvafiq səlahiyyət və maliyyələşdirməni təsdiqləməsindən asılıdır.
Konqresin razılığından sonra tərəflər müqavilənin yekun şərtlərini, qiymətləri və istehsal qrafikini müəyyənləşdirəcəklər.
15:23 22.10.2026
Oxunuş sayı: 77
