Azərbaycan Respublikası Elm Təhsil Nazirliyi Geologiya və Geofizika İnstitutunda müşavirə keçirilib
Oktyabrın 22-də “H.Cavid pr.115” ünvanı üzrə (Azərbaycan Respublikası Elm Təhsil Nazirliyi Geologiya və Geofizika İnstitutu) ərazi partiya təşkilatında Azərbaycan Respublikasının Prezidenti, Yeni Azərbaycan Partiyasının sədri cənab İlham Əliyevin YAP-ın VIII Qurultayındakı nitqindən irəli gələn məsələlərlə bağlı müşavirə keçirilib.
Crossmedia.az xəbər verir ki, müşavirədə YAP Yasamal rayon təşkilatının sədri Bəxtiyar Nəbiyev, Yeni Azərbaycan Partiyası Veteranlar Şurasının üzvü, akademik Akif Əlizadə, Azərbaycan Respublikası Elm Təhsil Nazirliyi Geologiya və Geofizika İnstitutunun direktoru Elçin Vəliyev, YAP Yasamal rayon təşkilatının əməkdaşları və ərazi partiya təşkilatının üzvləri iştirak ediblər.
Müşavirədən öncə İnstitutun inzibati binasında yerləşən Ulu Öndər Heydər Əliyevin abidəsi ziyarət olunaraq abidə önünə gül dəstələri düzülüb, Ümummilli Liderin əziz xatirəsi dərin ehtiramla yad edilib.
Müşavirə Azərbaycan xalqının Ümummilli Lideri Heydər Əliyevin və Azərbaycanın müstəqilliyi, ərazi bütövlüyü və suverenliyi uğrunda canından keçmiş şəhidlərin əziz xatirəsinin bir dəqiqəlik sükutla yad edilməsi ilə başlayıb. Ardınca Azərbaycan Respublikasının Dövlət Himni səsləndirilib.
Müşavirədə çıxış edən Elm və Təhsil Nazirliyinin Geologiya və Geofizika İnstitutunun direktoru Elçin Vəliyev qeyd edib ki, Yeni Azərbaycan Partiyasının VIII Qurultayı ölkənin ictimai-siyasi həyatında mühüm əhəmiyyətə malik hadisələrdən biridir. O vurğulayıb ki, Prezident İlham Əliyevin qurultaydakı nitqində səsləndirdiyi fikirlər və müəyyənləşdirdiyi strateji hədəflər ölkənin gələcək inkişaf istiqamətlərinin müəyyənləşdirilməsi baxımından xüsusi əhəmiyyət daşıyır. Direktor bildirib ki, dövlət başçısının rəhbərliyi ilə Azərbaycanda həyata keçirilən ardıcıl siyasət ölkənin beynəlxalq nüfuzunun daha da yüksəlməsinə, milli maraqların qorunmasına və davamlı inkişafın təmin olunmasına xidmət edir. Elçin Vəliyev ölkəmizdə elmin inkişafına, elmi tədqiqatların genişləndirilməsinə və alimlərin fəaliyyətinin dəstəklənməsinə göstərilən dövlət qayğısını xüsusi vurğulayıb. Qeyd olunub ki, Geologiya və Geofizika İnstitutu Azərbaycanın təbii sərvətlərinin öyrənilməsi, geoloji quruluşunun tədqiqi və geofiziki proseslərin araşdırılması istiqamətində mühüm elmi fəaliyyət həyata keçirir. Müasir dövrdə elmi potensialın gücləndirilməsi, innovativ yanaşmaların tətbiqi və elmi nəticələrin ölkənin sosial-iqtisadi inkişafına yönəldilməsi qarşıda duran əsas vəzifələrdəndir. Elçin Vəliyev həmçinin, elmi müəssisələrdə çalışan partiya üzvlərinin dövlətçilik ideyalarının təbliğində, milli həmrəyliyin gücləndirilməsində və gənc nəslin vətənpərvərlik ruhunda formalaşmasında fəal iştirakının vacibliyini diqqətə çatdırıb. O qeyd edib ki, institutda sağlam ictimai mühitin qorunması, əməkdaşların təşəbbüslərinin dəstəklənməsi və gənc tədqiqatçıların elmi fəaliyyətə cəlb olunması daim diqqət mərkəzində saxlanılmalıdır. Sonda direktor əmin olduğunu bildirib ki, kollektiv bundan sonra da ölkədə elmin inkişafına və dövlət siyasətinin prioritetlərinin həyata keçirilməsinə öz töhfəsini verəcəkdir.
Çıxış edən YAP Yasamal rayon təşkilatının sədri Bəxtiyar Nəbiyev bildirib ki, Yeni Azərbaycan Partiyası yarandığı gündən etibarən Azərbaycanın dövlətçilik maraqlarının qorunması, milli birliyin möhkəmləndirilməsi və ölkənin davamlı inkişafı istiqamətində mühüm rol oynayıb. O vurğulayıb ki, partiyanın siyasi xəttinin əsasında Ümummilli Lider Heydər Əliyevin müəyyənləşdirdiyi dövlətçilik prinsipləri və azərbaycançılıq ideologiyası dayanır. Bəxtiyar Nəbiyev qeyd edib ki, Prezident, Yeni Azərbaycan Partiyasının Sədri cənab İlham Əliyevin rəhbərliyi ilə Azərbaycan bütün sahələrdə mühüm nailiyyətlər əldə edib, ölkənin beynəlxalq mövqeləri daha da möhkəmlənib. O, YAP-ın VIII Qurultayının partiyanın gələcək fəaliyyət istiqamətlərinin müəyyənləşdirilməsi və müasir dövrün çağırışlarına uyğun yeni vəzifələrin qarşıya qoyulması baxımından əhəmiyyətini diqqətə çatdırıb. Rayon təşkilatının sədri qurultayda səsləndirilən fikirlərin və müəyyənləşdirilən prioritetlərin partiyanın yerli strukturları tərəfindən ardıcıl şəkildə həyata keçirilməsinin vacibliyini bildirib. Milli həmrəyliyin gücləndirilməsi, gənclərin ictimai-siyasi proseslərdə fəallığının artırılması və vətənpərvərlik dəyərlərinin təbliğinin əsas istiqamətlərdən olduğunu qeyd edib. Bəxtiyar Nəbiyev işğaldan azad edilmiş ərazilərdə həyata keçirilən genişmiqyaslı bərpa və quruculuq işlərinin Azərbaycanın gücünü, inkişaf potensialını və dövlətin öz vətəndaşlarına göstərdiyi qayğını nümayiş etdirdiyini vurğulayıb. O, elmi müəssisələrdə fəaliyyət göstərən ərazi partiya təşkilatlarının üzərinə mühüm vəzifələrin düşdüyünü, bu təşkilatların dövlətçilik ideyalarının təbliğində və ictimai fəallığın artırılmasında fəal iştirak etməli olduqlarını bildirib. Gənc alimlərin və tədqiqatçıların partiya fəaliyyətinə cəlb edilməsinin, onların təşəbbüslərinin dəstəklənməsinin və ictimai işlərdə iştirakının genişləndirilməsinin əhəmiyyətini xüsusi qeyd edib. Sonda Bəxtiyar Nəbiyev ərazi partiya təşkilatının üzvlərinə fəaliyyətlərində uğurlar arzulayaraq, qarşıya qoyulan vəzifələrin həyata keçirilməsi üçün birgə və məqsədyönlü fəaliyyətin vacibliyini vurğulayıb.
Çıxış edən Yeni Azərbaycan Partiyası Veteranlar Şurasının üzvü, akademik Akif Əlizadə qeyd edib ki, Azərbaycanın müasir inkişaf mərhələsi Ümummilli Lider Heydər Əliyevin müəyyənləşdirdiyi dövlətçilik strategiyasının Prezident, Yeni Azərbaycan Partiyasının Sədri cənab İlham Əliyev tərəfindən uğurla davam etdirilməsinin nəticəsidir. Akademik vurğulayıb ki, ölkənin əldə etdiyi nailiyyətlərin təməlində siyasi sabitlik, milli birlik, güclü dövlətçilik ənənələri və xalqın öz rəhbərliyinə olan inamı dayanır. O bildirib ki, Yeni Azərbaycan Partiyasının VIII Qurultayında səsləndirilən fikirlər və müəyyənləşdirilən hədəflər ölkənin gələcək inkişafı ilə yanaşı, partiyanın cəmiyyətdəki rolunun daha da gücləndirilməsi baxımından əhəmiyyətlidir. Akif Əlizadə Azərbaycanın elmi potensialının inkişaf etdirilməsinin, fundamental və tətbiqi tədqiqatların genişləndirilməsinin dövlətin strateji prioritetləri sırasında mühüm yer tutduğunu diqqətə çatdırıb. O qeyd edib ki, Geologiya və Geofizika İnstitutu ölkənin təbii sərvətlərinin öyrənilməsi, geoloji proseslərin tədqiqi və elmi biliklərin zənginləşdirilməsi sahəsində əhəmiyyətli fəaliyyət göstərir. Akademik elmi müəssisələrin inkişafında alimlərin peşəkarlığı, elmi ənənələrin qorunması və yeni nəslin tədqiqat fəaliyyətinə hazırlanmasının xüsusi əhəmiyyət daşıdığını bildirib. Gənc alimlərin elmi axtarışlara həvəsləndirilməsinin, onların müasir bilik və texnologiyalara yiyələnməsinin, eləcə də beynəlxalq elmi əməkdaşlıq imkanlarının genişləndirilməsinin vacibliyini vurğulayıb. Akif Əlizadə, həmçinin, elmi ictimaiyyətin ölkədə həyata keçirilən islahatlara dəstək verməsinin və cəmiyyətin inkişafına öz intellektual töhfəsini təqdim etməsinin əhəmiyyətindən danışıb. Qeyd olunub ki, partiya təşkilatları elmi müəssisələrdə çalışan əməkdaşların təşəbbüslərinin birləşdirilməsi, ictimai fəallığın artırılması və dövlətçilik dəyərlərinin təbliği baxımından mühüm platformadır. Sonda akademik Akif Əlizadə Azərbaycanın gələcək inkişafında elmin rolunun daha da artacağına inamını ifadə edərək, institutun kollektivinə elmi fəaliyyətlərində və ölkənin elmi potensialının gücləndirilməsi istiqamətində həyata keçirdikləri işlərdə uğurlar arzulayıb.
Müşavirənin sonunda Yeni Azərbaycan Partiyasının Himni səsləndirilib və xatirə şəkli çəkdirilib.
13:09 22.10.2026
Oxunuş sayı: 83
