Makron Fransanın daxili işlər nazirinin istefasını rədd edib
Fransanın daxili işlər naziri Loran Nünez ölkədə kütləvi iğtişaşlar fonunda istefa vermək istəsə də, Prezident Emmanuel Makron onun istefasını qəbul etməyib.
Crossmedia.az xəbər verir ki, “BFMTV” bu barədə məlumat yayıb.
Telekanalın məlumatına görə, Makron nazirdən iğtişaşların iştirakçılarına qarşı mübarizə aparmaq üçün hüquq-mühafizə orqanlarının fəaliyyətinə dair yeni strategiyanın hazırlanmasını və mümkün qədər tez tətbiqini istəyib.
Yelisey sarayının oktyabrın 19-da yaydığı açıqlamada bildirilib ki, Makron oktyabrın 18-də Nünezə vəzifəsində qalmağı tapşırıb. Qərar hazırkı şəraitdə hüquq-mühafizə orqanları üzərində nəzarətin qorunmasının zəruriliyi ilə izah olunub.
Fransada oktyabrın 17-də keçirilən etiraz aksiyaları bir sıra şəhərlərdə zorakılıq, talan və ictimai binalara hücumlarla müşayiət olunub. Hadisələrdən sonra daxili işlər nazirinin istefasını tələb edən siyasi qüvvələrin sayı artıb.
Məlumata görə, Nünez zorakılıqdan ciddi zərər çəkən Marsel şəhərinə səfər etməlidir. Təqdim olunan xəbərdə hakimiyyət orqanlarının qiymətləndirməsinə əsasən, şənbə günü şəhərdə talanlarda iştirak edənlərin sayının 30 minə çatdığı bildirilir. Bu rəqəm müstəqil şəkildə təsdiqlənməyib.
09:45 19.10.2026
Oxunuş sayı: 58
