Süni intellekt interneti məhv edir?
İnternetin getdikcə qəribələşdiyini və faydasını itirdiyini düşünənlər az deyil. Getdikcə daha çox insan süni intellektin ucuz və keyfiyyətsiz mətnlərlə interneti dolduraraq onun məzmununa zərər vurmasından narahatdır.
Crossmedia.az xəbər verir ki, hazırda botlar bütün internet trafikinin 60 faizindən çoxunu təşkil edir, yeni veb-səhifələrin böyük bir hissəsi isə süni intellekt tərəfindən hazırlanır. Bu vəziyyət “ölü internet nəzəriyyəsi” ilə əlaqələndirilir. Həmin nəzəriyyəyə görə, internetdə insanlar tərəfindən yaradılan orijinal məzmun getdikcə yoxa çıxır.
Böyük texnologiya şirkətlərinin rəhbərləri də bu problemin fərqindədirlər. Süni intellekt əsaslı axtarış sistemləri müəlliflərin hazırladığı məzmunu ümumiləşdirərək istifadəçilərə təqdim edir. Nəticədə insanlar ilkin mənbələrə daha az daxil olur, xəbər redaksiyaları isə gəlirlərini itirərək fəaliyyətlərini dayandırmaq təhlükəsi ilə üzləşirlər.
İnsan müəlliflərin sayı azaldıqda süni intellektin özünün yaratdığı keyfiyyətsiz məzmun əsasında öyrənməsi riski artır. Bu isə yanlış məlumatların, səhvlərin və zərərli tövsiyələrin çoxalmasına səbəb ola bilər.
İnterneti qorumaq üçün ilkin mənbələrə daxil olmaq, məlumatın müəllifini yoxlamaq və peşəkar jurnalistikanı dəstəkləmək vacibdir.
08:50 19.10.2026
Oxunuş sayı: 63
