"Washington Post"da qalmaqal - əməkdaş istefa verdi
ABŞ-ın nüfuzlu qəzetlərindən biri olaraq tanınan “Washington Post” qalmaqalla qarşılaşıb. “Demokratiya qaranlıqda ölür” şüarı ilə ifadə azadlığının vacibliyini vurğulayan xəbər qurumu öz maraqlarına zidd hesab etdiyi rəsm əsərini dərc etməməklə ikiüzlülüyünü ortaya çıxarıb.
Crossmedia.az xarici KİV-ə istinadən xəbər verir ki, məşhur karikaturaçı Ann Telnaes, Tramp və Ceff Bezos kimi bir neçə iş adamı ilə bağlı tənqidi əsəri dərc olunmadığı üçün bu media qurumundan istefa verib.
ABŞ-da yerləşən "Washington Post" qəzetinin karikaturaçısı Ann Telnaes Ceff Bezos və digər media və texnologiya baronlarını, növbəti ABŞ prezidenti olacaq Donald Trampın qarşısında diz çökərək təsvir edib. Lakin redaktor həmin karikaturanı dərc etməkdən imtina edib. Nəticədə Telnaes iftefa verərək işdən çıxıb.
Telnaes bildirib ki, karikatura ABŞ-ın yeni seçilmiş prezidenti Trampın rəğbətini qazanmaq üçün əlindən gələni edən milyarder texnologiya və media rəhbərlərini tənqid etmək üçün hazırlanıb.
Telnaes, əvvəllər heç bir karikaturasının məzmununa görə rədd edilmədiyini bildirib. Belə bir hərəkətin azad media üçün təhlükəli bir addım olduğunu vurğulayıb.
Telnaes “Washington Post” qəzetinin ifadə azadlığını təmsil edən “Demokratiya qaranlıqda ölür” şüarının əslində tətbiq olunmadığını deyərək tənqid edib: “Bir karikaturaçı kimi mənim işim qüdrətli insanları və qurumları öz hərəkətlərinə görə məsuliyyətə cəlb etməkdir. İlk dəfə redaktorum bu kritik işi görməkdə mənə mane oldu. Buna görə də mən postdan ayrılmaq qərarına gəldim. Mən karikaturalarımla həqiqəti təsvir etməkdən əl çəkməyəcəyəm, çünki necə deyərlər, "Demokratiya qaranlıqda ölür."
Amerika Karikaturaçılar Cəmiyyəti şənbə günü verdiyi bəyanatda redaksiyanı siyasi qorxaqlıqda günahlandırıb. Digər karikaturaçılardan isə həmrəylik əlaməti olaraq Telnaesin çəkdiyi rəsmləri #StandWithAnn heşteqi ilə paylaşmalarını istədi.
Dərnək, "Zorakılıq qələmin ucunda bitir və qaranlıqda inkişaf edir. "Washington Post" sadəcə gözlərini yumdu və yumruq almış boksçu kimi təslim oldu" sözlərini dedi.
"New York Times"ın məlumatına görə redaktor Devid Şipli qəzetin Telnaesin karikaturasını dərc etməmək qərarını müdafiə edib. Şipli bildirib ki, o, hadisələrin təfsiri ilə bağlı Telnaeslə razı deyil.
Telnaes cümə günü karikaturasının qaralamasını paylaşdı. Karikaturada qəzeti satın almadan əvvəl "Amazon"u quran Bezosdan başqa, "Meta"nın qurucusu Mark Zukerberq, "Los Angeles Times"ın sahibi Patrick Soon-Shiong və "Walt Disney Co"nun personajı "Mickey Mouse" da yer alıb.
Tərlan Əmrahova
19:24 05.01.2025
Oxunuş sayı: 3146
