Sabiq baş nazir vəfat etdi
Yunanıstanın keçmiş baş nazirlərindən olan Kostas Simitis 88 yaşında dünyasını dəyişib. Crossmedia.az xarici KİV-ə istinadən xəbər verir ki, Yunanıstanından verilən açıqlamada keçmiş baş nazir Simitisin bu səhər təcili yardımla xəstəxanaya gətirildiyi, lakin dünyasını dəyişdiyi bildirilib.
Yunanıstan Dövlət Televiziyası ERT-nin xəbərinə görə, bu səhər dünyasını dəyişən Simitis Milad bayramı üçün Korinfdəki bağ evində olub və səhhətində heç bir problem olmayıb.
Yunanıstanın baş naziri Kiryakos Mitsotakis, ən böyük rəqibi haqqında verdiyi açıqlamada "Ölkəyə vacib addımlarda yoldaşlıq edən dəyərli və nəzakətli siyasi rəqib Kostas Simitisi kədər və hörmətlə yola salıram" deyib.
Baş nazir, Kostas Simitisin 1967-1974-cü illərdə Yunanıstanda hökmranlıq edən xunta rejiminə qarşı apardığı mübarizəyə diqqət çəkərək, sonradan PASOK-un qurucu üzvü və partiya lideri olaraq üzərinə götürdüyü liderlik rollarını xatırladıb. Mitsotakis Simitisin həyat yoldaşı Dafni Simitisə və uşaqlarına başsağlığı verib.
Qeyd edək ki, 1936-cı ildə anadan olan Simitis Yunanıstanda dəfələrlə hakimiyyətdə olan PASOK-un qurucularından olub. 1996-2004-cü illərdə isə həm PASOK lideri, həm də baş nazir vəzifələrində çalışıb.
Tərlan Əmrahova
18:09 05.01.2025
Oxunuş sayı: 7465
