Yaşıl pasportlarla Avropaya girişə yeni qaydalar tətbiq ediləcək
Avropa İttifaqı Türkiyə vətəndaşlarının yaşıl pasportlarına görə "əvvəlcədən viza" sistemini tətbiq etməyə başlayır. 2025-ci ilin ilk yarısından etibarən Almaniya, Fransa və Niderland ETİAS (Avropa Səyahət Məlumatı və İcazə Sistemi) adlanan sistemə qoşulacaq. Yaşıl pasport sahibləri əvvəlcə proqramı yükləyərək 7 avro ödəməli, daha sonra pasport və ödəniş məlumatlarını sistemə daxil etməlidirlər. Əgər sistem müsbət cavab verməzsə, həmin şəxs Avropa ölkələrinə səfər edə bilməyəcək.
Crossmedia.az-ın məlumatına görə, bu barədə Türkiyə mediası xəbər yayıb.
2025-ci ilin ilk yarısında istifadəyə veriləcək ETİAS sistemi Avropa İttifaqına üzv dövlətlərlə yanaşı, İsveçrə, İslandiya, Norveç və Lixtenşteynə səfər edənlər üçün də keçərli olacaq. Yaşıl və ya boz pasport sahibləri, viza tələb olunmayan şəxslər belə, Avropaya səyahət etməzdən əvvəl sistemdə qeydiyyatdan keçməlidirlər.
2021-ci ildə tətbiq olunmalı olan bu sistemin həyata keçirilməsini Almaniya, Fransa və Niderland təxirə salmışdı. Lakin bəzi digər Avropa ölkələri sistemi 2024-cü ilin noyabr ayından etibarən tətbiq etməyə başlayıb. Təhlükəsizlik məqsədilə yaradılmış ETİAS sistemi vasitəsilə səyahət icazələri əvvəlcədən yoxlanılacaq. Məlumatlara görə, müraciətlərin 90-95 faizinə müsbət cavab veriləcəyi gözlənilir.
Xüsusilə Türkiyə vətəndaşlarının ən çox ziyarət etdiyi ölkələrdən olan Almaniyaya səfər edən yaşıl və ya diplomatik pasport sahiblərinə sistemlə bağlı ilkin bildirişlərin 2025-ci ilin birinci yarısında göndəriləcəyi planlaşdırılır. ETİAS-ın ümumilikdə 1 milyard insanı, o cümlədən türkləri əhatə edəcəyi bildirilir.
Emil Bağızadə
11:20 05.01.2025
Oxunuş sayı: 2886
