Xarici xəbərlər

Türkiyə Suriyanın bu şəhərlərinə elektrik enerjisi tədarük etməyə başladı

Türkiyənin Energetika və Təbii Sərvətlər Naziri Alparslan Bayraktar Suriyanın elektrik enerjisi infrastrukturunun bərpası üçün ciddi sərmayələrin tələb olunduğunu bildirib və bu prosesdə beynəlxalq ictimaiyyətin dəstəyinin vacibliyini vurğulayıb.

Crossmedia.az Anadolu agentliyinə istinadən xəbər verir ki, Bayraktar deyib:

“Keçən həftə Suriyaya səfər edən nazirliyin nümayəndə heyəti ölkəyə qayıdıb. Ekspertlər müəyyən ediblər ki, Suriyanın enerji infrastrukturu yaxşı vəziyyətdə deyil və onun bərpası üçün xeyli sərmayə tələb olunur. Beynəlxalq ictimaiyyət Suriyanın bərpasına yardım etməlidir”.

Nazir həmçinin Türkiyədən Suriyanın bəzi şəhərlərinə, o cümlədən Hələb və Afrinə elektrik enerjisi tədarükünün başladığını qeyd edib.

“Bu tədarükləri daha cənub istiqamətində genişləndirə bilərik. Bundan əlavə, dizel generatorları üçün yanacaq təminatı da mümkündür,” - deyə Bayraktar əlavə edib.

Qeyd edək ki, bundan əvvəl Türkiyə hökuməti Suriyanın yeni rəhbərliyi ilə birgə ölkənin elektrik enerjisi sahəsində inkişafı üçün baş planın hazırlanacağını açıqlamışdı.

Emil Bağızadə