Yaxın Şərq

Türkiyənin 2025-ci ildən gözləntiləri: terror bitir, yeni dönəm başlayır

Dövrün əsas problemlərindən biri terror qruplaşmalarının dövlətlər və sivil toplumlara qarşı olan amansız addımlardır. Terror qruplaşmalarına qarşı dövlətlər ciddi tədbirlər görür və bunun üçün xüsusi hərbi birləşmələr yaradılır. Terrora qarşı mübarizədə lider dövlətlərdən biri də Türkiyə Cümhuriyyətidir. Suriyanın şimalında yerləşən və Türkiyəyə qarşı dəfələrlə terror aktı törədən bu birləşmələrlə Türkiyə illərdir mübarizə aparır.
Suriyada olan inqilab bölgədəki geosiyasi vəziyyəti dəyişdi. Bəs bu Türkiyə üçün 2025-də terroru ərazidə təmamilə bitirmək üçün şərait yaradırmı?
Mövzu ilə bağlı politoloq Əli Zülfüqaroğlu Crossmedia.az saytına açıqlama verib:
"Türkiyə ölkə daxilindəki terror qruplarını demək olar ki, tamamilə məhv edib. Əvvəlki dönəmlərdən fərqli olaraq, artıq Türkiyə daxilində mütəmadi olaraq terror aktı törətmək qeyri-mümkündür. Digər tərəfdən, PKK terror təşkilatına qarşı Şimali İraqda ağır zərbələr vurulub və bu istiqamətdə fəaliyyət davam edir. Amma YPG və PYD terror təşkilatları özlərini ayrı qurumlar kimi təqdim etsələr də, ABŞ bu terror qruplarını Suriya Demokratik Qüvvələri adı altında tanıtsa da, bunlar Türkiyəyə qarşı təhdid törədən və PKK-nın törəmə quruluşları olan terror təşkilatlarıdır".

Məsələdə ABŞ rolundan danışaq politoloq qeyd edib: "Görünən odur ki, ABŞ YPG və PYD-ni Suriyanın istər yeni hökumətinə, istərsə də Türkiyəyə qarşı bir kart kimi istifadə etmək məqsədilə ləğv etmək niyyətində deyil. Buna görə də Türkiyə fərqli bir addım ataraq Demokrat Partiyası ilə danışıqlara başladı və "Yeni Həll Prosesi" adlanan bir mərhələyə qədəm qoydu. Türkiyənin hakim partiyası ilə birlikdə Cümhur İttifaqı bu addımı atdı. Lakin bu, ölkə daxilində kifayət qədər tənqidlə qarşılandı və Türkiyənin dövlətçiliyi baxımından riskli bir addım kimi qiymətləndirildi. Türkiyə, danışıqlar yolu ilə Abdullah Öcalanın PKK-nın silahsızlaşdırılması ilə bağlı çağırışına nail olmaq və beləliklə terror təhdidlərini tamamilə bitirmək istəyir".
Abdullah Öcalanın çağırışının nəticə verməyəcəyini deyən politoloq bildirib: "Lakin mən düşünürəm ki, Öcalanın çağırışı həlledici nəticə verməyəcək. Çünki PKK rəhbərliyində olan bir sıra şəxslər açıqlama veriblər ki, Öcalan artıq PKK daxilində söz sahibi deyil və hökumətin təsiri altındadır. Buna görə də hesab edirəm ki, PKK-ya qarşı ən doğru variant indiyə qədər yürüdülən siyasi xətt, yəni hərbi əməliyyatlarla terror təşkilatının birdəfəlik məhv edilməsidir. Halbuki bu istiqamətdə hökumət tərəfindən effektli addımlar atılıb".
2025-ci ildə terrora qarşı mübarizənin verəcəyi nəticədən danışan Əli Zülfüqaroğlu deyib: "Gələcəkdə də PKK-ya qarşı effektli mübarizə aparıla bilər. Çünki indiyə qədər əldə olunan nəticələrə baxsaq görərik ki, artıq Şimali İraqda da PKK ciddi zərbələr alıb, fəaliyyət dairəsi daralıb və eyni zamanda Şimali İraqda Kürd Muxtariyyəti ilə PKK arasında ziddiyyətlər mövcuddur. Bu məqamlar Türkiyə hökumətinin hesabladığı məsələlərdir və yeni bir mərhələnin başlanğıcını görəcəyik. Düşünürəm ki, indiyə qədər yürüdülən fəaliyyət, bundan sonra yürüdüləcək fəaliyyətlə birlikdə onu deməyə əsas verir ki, PKK bundan sonrakı dönəmlərdə Türkiyəyə qarşı ciddi bir təhdid formalaşdıra bilməyəcək".