Azərbaycandan Suriyaya göndərilən humanitar yardım Türkiyə ərazisinə daxil olub
Azərbaycandan Suriyaya göndərilən 200 tonluq ərzaq məhsullarını daşıyan 10 yük maşını Sarp Sərhəd Keçid Məntəqəsindən keçərək Türkiyə ərazisinə daxil olub.
Crossmedia.az “Haber Global”a istinadən xəbər verir ki, Azərbaycan dövlətinin təşkil etdiyi humanitar yardım, AFAD-ın koordinasiyası ilə Türkiyə üzərindən tranzit olaraq Kilisdəki Çobanbəy Sərhəd Keçid Məntəqəsindən keçib. Yardım yükləri AFAD-ın Logistika Anbarlarına çatıb. Hazırlıqlar tamamlandıqdan sonra Suriyadakı ehtiyac sahiblərinə paylanılıb.
Yardım tırlarından birinin sürücüsü İlhan Bayram Azərbaycan xalqının həmrəylik ruhunu vurğulayıb:
“Azərbaycandan 10 maşınla yola çıxdıq. Sağ olsun azərbaycanlı qardaşlarımız, Suriyadakı müsəlman qardaşlarımızı düşünərək bu yardımı təşkil etdi. AFAD komandası və Sarp Gömrük rəsmiləri bizi burada qarşıladı. Təxminən 36 saatdır yoldayıq.”
Başqa bir sürücü Mahmud Qıraç bu mənalı yardımı çatdırmaqdan duyduğu məmnuniyyəti ifadə edib:
“Üç gündür yoldayıq. Azərbaycan dövləti tərəfindən göndərilən yardım materiallarını Suriyadakı ehtiyac sahiblərinə çatdıracağıq. Əməyi keçən hər kəsə təşəkkür edirik.”
Fidan Hacızadə
10:26 03.01.2025
Oxunuş sayı: 5339
