Kaliforniyada kiçik təyyarə bina ilə toqquşub: 2 ölü, 18 yaralı
ABŞ-nin Kaliforniya ştatının cənubunda kiçik təyyarənin kommersiya binasına çırpılması nəticəsində 2 nəfər həlak olub, 18 nəfər yaralanıb.
Crossmedia.az bildirir ki, hadisə Fullerton şəhərində baş verib. Polis bildirib ki, 10 yaralı xəstəxanaya yerləşdirilib, 8 nəfərə isə yerində yardım göstərilib. Təyyarə Van’s RV-10 modelidir və Federal Aviasiya Administrasiyasına görə, qəza yerli vaxtla saat 14:15-də baş verib. Qəzanın səbəbi hələlik açıqlanmayıb.
Təyyarə qəzası binada yanğına səbəb olub, lakin yanğınsöndürənlər tərəfindən tezliklə söndürülüb. Məlumata görə, bina mebel istehsalı müəssisəsidir. Təyyarənin toqquşduğu vaxt içəridə 100-ə yaxın işçi olub.
Hadisə şahidlərinin dediyinə görə, qəza zamanı güclü partlayış baş verib. Şahidlərdən biri, Juanita Ramirez, bunun “yuxu kimi” hiss edildiyini bildirib.
Bu, son iki ay ərzində bölgədə baş verən ikinci təyyarə qəzasıdır. Noyabr ayında yaxınlıqda başqa bir təyyarə qəzası qeydə alınıb, lakin o zaman ciddi xəsarət alan olmayıb.
Qeyd edək ki, rəsmilər hadisə ilə bağlı araşdırmanı davam etdirirlər.
Gültac Mehdizadə
07:34 03.01.2025
Oxunuş sayı: 5340
