Trampın otelinin qarşısında partlayan Tesla avtomobilinin sürücüsünün kimliyi məlum olub
ABŞ-ın Las-Veqas şəhərində yeni seçilmiş prezident Donald Trampa məxsus otelin qarşısında partlayan “Tesla” markalı avtomobili idarə edən və hadisə zamanı həyatını itirən şəxsin kimliyi məlum olub. Crossmedia.az bu barədə Anadolu Agentliyinə istinadən xəbər verir.
ABŞ mətbuatına məlumat verən rəsmilər, avtomobildəki şəxsin ABŞ ordusundan Metyu Alan Livelsberger olduğunu açıqlayıb. Bildirilib ki, Koloradoda anadan olan 37 yaşlı Livelsberger 2006-cı ilin yanvarında xüsusi təyinatlıların rabitə mütəxəssisi kimi ABŞ ordusuna qatılıb və ABŞ-ın Almaniyadakı hərbi bazasında xidmət edən əsgər olub.
Livelsbergerin 2024-cü ilin noyabr ayından orduda uzaqdan və avtonom sistemlər üzrə menecer kimi çalışdığı, partlayış baş verən gün Koloradoda məzuniyyətdə olduğu qeyd edilib.
Orduda xidmət etdiyi müddətdə atəş altında göstərdiyi şücaətə görə medal, döyüş piyada nişanı və şücaət medalı və iki Tunc Ulduzla təltif edilən Livelsbergerin onlayn avtomobil paylaşımı olan Turo-dan Tesla Cybertruck tipli nəqliyyat vasitəsini icarəyə götürdüyü müəyyən edilib.
Las Vegas Clark County-nin polis şefi Kevin McMahill mətbuat konfransında Livelsbergerin Tesla avtomobili partlamadan əvvəl başına atəş açdığını, tapançanın başından aldığı yara ilə birlikdə tapıldığı barədə məlumat paylaşıb. Makmahill bildirib ki, avtomobilin içərisində yanmış əşyalar arasında ikinci odlu silah, pasport, hərbi bilet, kredit kartları, iPhone və smart saat var. Hər iki silahın qanuni yolla alındığı açıqlanıb.
Livelsbergerin partlama nəticəsində avtomobildə tanınmaz dərəcədə yandığı qeyd edilib. Tapılan şəxsiyyət vəsiqəsi və əlavə müayinələr əsasında onun avtomobilin sürücüsü olduğu qənaətinə gəlinib. Bunu təsdiqləmək üçün DNT analizi aparılacaq.
Yeni ilin ilk günü, yerli vaxtla səhər saat 08.15 radələrində Las-Veqasda Tramp otelinin qarşısında Tesla markalı avtomobil partlayaraq yanıb, maşında olan şəxs ölüb, yaxınlıqdakı 7 nəfər yüngül xəsarət alıb. Las-Veqas polisi avtomobilin yük yerindən doldurulmuş piknik boruları, həmçinin atəşfəşanlıq tapıldığını açıqlayıb.
ABŞ prezidenti Co Bayden də dünən axşam verdiyi açıqlamada, FTB-nin Yeni Orleanda 15 nəfərin ölümü ilə nəticələnən avtomobil hücumu ilə Las Veqasda Tesla partlayışı arasında əlaqə olub-olmadığını araşdırdığını, lakin hələlik bir nəticəyə gəlmədiyini bildirib.
Federal Təhqiqatlar Bürosunun Terrorla Mübarizə Şöbəsindən Kristofer Raia bu gün verdiyi açıqlamada Yeni Orleanda avtomobil hücumu ilə Tesla Cybertruck avtomobilinin Las-Veqasdakı "Trump International" otelinin qarşısında partlaması arasında "əlaqənin olmadığını" bildirib.
Raia, "bu ehtimalı istisna etmədiklərini" ifadə edərək, hadisənin təfərrüatları ilə bağlı heç bir ehtimalın istisna edilmədiyini əlavə edib.
02:33 03.01.2025
Oxunuş sayı: 4804
