FBI hələlik Nyu-Orlean və Las-Veqas terror hücumları arasında əlaqə görmür
Büro direktorunun müavini Kristofer Raya bildirib ki, araşdırma ilkin mərhələdədir
Crossmedia.az “TASS” xəbər agentliyinə istinadən xəbər verir ki, ABŞ Federal Təhqiqatlar Bürosu (FBI) hazırda Nyu-Orlean (Luiziana) və Las-Veqasda (Nevada) baş verən terror hücumları arasında hər hansı bir əlaqə görmür. Bu barədə Büro direktorunun müavini Kristofer Raya mətbuat konfransında bildirib.
“Hazırda Nyu-Orleandakı hücumla Las-Veqasdakı Trump Hotel yaxınlığında Tesla Cybertruck partlayışı arasında qəti bir əlaqə yoxdur,” deyə o vurğulayıb.
FBI rəsmisi araşdırmanın ilkin mərhələdə olduğunu qeyd edib.
Çərşənbə günü, Las-Veqasda 64 mərtəbəli Trump International Hotel yaxınlığında elektriklə işləyən Cybertruck pikap maşını partladı. Hadisə nəticəsində azı bir nəfər həyatını itirib, yeddi nəfər isə yaralanıb. Ölən şəxsin kimliyi hələ müəyyənləşdirilməyib.
Yeni il gecəsi, yerli vaxtla səhər saat 3 radələrində Nyu-Orleanın mərkəzindəki Bourbon küçəsində bir avtomobil insan kütləsinə çırpılıb. Avtomobil dayandıqdan sonra, sürücü polis əməkdaşlarına atəş açmağa başlayıb və cavab atəşi ilə öldürülüb. Son məlumata görə, hadisə nəticəsində 14 nəfər həyatını itirib, ən azı 30 nəfər isə yaralanıb.
FBI, TASS-ın sorğusuna cavab olaraq, hadisəni terror hücumu kimi qiymətləndirdiyini bildirib. Cinayəti törədən şəxsin Texasdan olan ABŞ vətəndaşı Şəmsuddin Cabbar olduğu müəyyən edilib. Hücum anında onun yanında İslam Dövləti (Rusiyada qadağan olunmuş İD) terror təşkilatının bayrağı olub.
Maral Şahverdili
21:36 02.01.2025
Oxunuş sayı: 5009
