Litvada 10 il əvvəl dövriyyədən çıxarılmış 116 milyon avro dəyərində lit qalıb
Litvada 2015-ci ildən bəri rəsmi ödəniş vasitəsi avro olmasına baxmayaraq, əhali hələ də 10 il əvvəl dövriyyədən çıxarılmış 400 milyon lit, yəni 116 milyon avro məbləğində pulu dəyişdirməyib.
Crossmedia.az xəbər verir ki, bu barədə "Lietuvos bankas"ın ("Litva Bankı") nağd pul departamentinin rəhbəri Deivis Stankeviçius məlumat verib.
"Pul vahidinin dəyişdirilməsindən keçən 10 il ərzində insanlar 5,4 milyard lit (1,56 milyard avro) dəyişdirib. Lakin dəyişdirilməyən məbləğ hələ də 116 milyon avrodur", - deyə o bildirib.
Avroya keçid zamanı dövlət milli valyutanın "Lietuvos bankas"da ömür boyu dəyişdirilə biləcəyini vəd etmişdi. Bu proses Vilnüs və Kaunas şəhərlərindəki filiallarda ödənişsiz olaraq rəsmi məzənnə ilə (1 avro = 3,4528 lit) həyata keçirilir.
Pul vahidinin dəyişdirilməsi zamanı dövriyyədə 11,3 milyard lit (3,7 milyard avro) mövcud idi. 2014-cü ilin sonlarında bu məbləğ 5,8 milyard litə (1,7 milyard avro) qədər azalmış, 2015-ci ilin sonunda isə 535 milyon lit (155 milyon avro) təşkil etmişdi.
Emil Bağızadə
09:59 02.01.2025
Oxunuş sayı: 4583
