Paşinyan devrilə bilər? - erməni siyasətçilər ona qarşı birləşir
Ermənistanda sosial-siyasi böhran davam etməkdədir. Belə ki, hakim partiya olan "Mülki müqavilə" partiyasının deputatları, Baş nazir Nikol Pasinyanın partiya yoldaşları artıq ona qarşı yeni cəbhədə birləşiblər. Ermənistanın hakim “Mülki müqavilə” Partiyasından qovulan deputat Ovik Ağazaryan yeni siyasi partiya yaradıb.
Belə ki, Ovik Ağazaryan “Mülki müqavilə” Partiyasından çıxarıldıqdan sonra siyasi birliyini yaratmaq qərarına gəlib. Ona parlamentin daha bir deputatı, hakim “Mülki müqavilə” partiyasından uzaqlaşdırılan Akop Aslanyan da qoşulub. Ağazaryan qeyd edib ki, müzakirələrdən sonra partiyanın konsepsiyasında dəyişikliklər mümkündür.
Bu olanlar erməni xalqı ilə yanaşı erməni siyasətçilərinin də Pasinyana olan inamsızlığının nəticəsidirmi?
Həmçinin bu hadisələr 2025-də Pasinyan hakimiyyətinin sonunu gətirə bilərmi?
Mövzu ilə bağlı politoloq Elçin Xalidbəyli Crossmedia.az saytına açıqlama verib:
"Hazırda Ermənistan cəmiyyətində parçalanma prosesi başlayıb. İlk növbədə, Ermənistan cəmiyyətinin özünün parçalandığı qətiyyən şübhə doğurmur. Bir tərəfdə Qərbə inteqrasiya, digər tərəfdə isə Rusiyaya bağlı siyasi qüvvələr qarşı-qarşıya gəlib və amansız mübarizə aparırlar. Eyni zamanda, bu parçalanma Paşinyan hakimiyyətinin daxilinə də sıçrayıb. Paşinyanın ikibaşlı siyasəti çoxunu narahat edir. Onlar hesab edirlər ki, Paşinyan Rusiya ilə bu qədər kəskin münasibətlərə səbəb olmaqla Ermənistanı təhlükə altında qoyur. Digər tərəf isə hesab edir ki, Paşinyan Rusiyaya qarşı yetərincə müqavimət göstərmir, Qərbə inteqrasiya siyasətində ləng davranır və Qərbdən gələn təlimatları vaxtında yerinə yetirməkdə çətinlik çəkir. Ona görə də Paşinyan hakimiyyətinin daxilində bir parçalanma var".
Politoloq 2026-cı ildə Ermənistanda olacaq parlament seçkilərinə də proqnoz verib:
"Bu proseslər Ermənistanda 2026-da keçiriləcək növbəti parlament seçkiləri öncəsində qüvvələr nisbətinin dəyişə biləcəyini göstərir. Yəni Nikol Paşinyan hazırda keçmiş prezidentləri Qarabağ məsələsində güzəştli mövqe tutmaqda günahlandırmaqla indiki situasiyanın günahkarları sırasında keçmiş prezidentləri göstərməyə çalışır. Keçmiş prezidentlər hazırda erməni müxalifətinə liderlik etdiyi üçün onları nüfuzdan salmaq istəyir. Bununla da cəmiyyətdə nüfuzu aşağı düşən Paşinyan seçki yaxınlaşdıqca seçicilərin dəstəyini yenidən qazana biləcəyinə ümid bəsləyir. Bu prosesə, təbii ki, Paşinyanın partiyasının daxilindəki narazılıqlar da ciddi problemlər yaradır. Paşinyanın indiki tərəfdarlarının bəziləri seçki ərəfəsində ona qarşı olan düşərgəyə də keçə bilərlər. Hazırda Ermənistan cəmiyyətində olduqca qəliz situasiya yaranıb və baş verənlər böyük ölçüdə növbəti parlament seçkilərində daha üstün mövqelər tutmağa hesablanıb".
Ayhan Ağarzayev
10:55 01.01.2025
Oxunuş sayı: 4293
