Paşinyan növbəti dəfə Qarabağı Azərbaycan ərazisi kimi tanıdı
Crossmedia.az xəbər verir ki, Ermənistanın Baş Naziri Nikol Paşinyan, Yeni il müraciətində “real Ermənistan” ideologiyasını ölkənin siyasi xəttinin əsas prinsipi kimi təqdim edib. O, bu yanaşmanın sülhü təmin etməyə kömək edəcəyini bildirib.
"Real Ermənistan ideologiyası olmadan sülh gündəliyini həyata keçirmək mümkün deyil... Bu, yalnız xalqımızdan və hökumətimizdən asılı deyil. Amma mən təklif edirəm ki, başqalarının deyil, öz hərəkətlərimizə və sözlərimizə fokuslanaq. Bu, zəmanət olmasa da, müvəffəqiyyətin əsas şərtidir," – deyə Paşinyan “Novosti-Armeniya”ya verdiyi açıqlamada vurğulayıb.
Paşinyan "real Ermənistan"ın 29,743 kvadrat kilometr əraziyə malik olduğunu qeyd edib. Bu, Dağlıq Qarabağın Azərbaycan ərazisi olduğunu dolayısı ilə təsdiqləyir və həmin ərazinin "real Ermənistan"ın tərkibinə daxil olmadığını göstərir.
“Real Ermənistan hər bir vətəndaşın təhlükəsizliyini, rifahını və xoşbəxtliyini təmin edən, onların kimliklərini qoruyan və inkişaf etdirən bir vasitədir. Bundan başqa heç bir anlam daşımır,” – deyə Baş Nazir əlavə edib.
Bu bəyanat, Ermənistan rəhbərliyinin Dağlıq Qarabağın Azərbaycana məxsusluğunu növbəti dəfə açıq şəkildə qəbul etdiyini göstərir.
09:35 01.01.2025
Oxunuş sayı: 4443
