Britaniya, Fransa və Kanada işğal olunmuş İordan çayının qərb sahilindəki İsrail yaşayış məntəqələrindən məhsulların idxalını qadağan edəcək.
Crossmedia.az xəbər verir ki, “Haaretz” bu barədə məlumat yayıb.
Böyük Britaniyanın xarici işlər naziri Ed Miliband sentyabrın 8-də parlamentdə açıqlayıb ki, Fransa və Kanada da eyni gündə yaşayış məntəqələrindən məhsulların idxalına qadağa tətbiq edəcək.
Miliband bildirib ki, yaşayış məntəqələrinin genişləndirilməsi Fələstin dövlətinin yaradılması perspektivini təhlükə altına qoyur. O, Britaniyanın artıq yalnız bu siyasəti tənqid etməklə kifayətlənməyəcəyini və konkret tədbirlər görəcəyini deyib.
Fransa qərarını yaşayış məntəqələrinin genişlənməsi və İordan çayının qərb sahilində fələstinlilərə qarşı zorakılığın artması ilə əsaslandırıb. Kanada isə yaşayış məntəqələrinin iki dövlətli həll perspektivinə ciddi zərər vurduğunu bildirib.
Qərarın iqtisadi təsirinin məhdud olacağı gözlənilir. Səbəb yaşayış məntəqələrinin ixracının İsrailin ümumi xarici ticarətində kiçik paya malik olmasıdır. Buradan əsasən kənd təsərrüfatı məhsulları, o cümlədən xurma, sitrus meyvələri, göyərti və şərab ixrac olunur.
Böyük Britaniya, Fransa və Kanadadan başqa daha 10 ölkə iki dövlətli həllə dəstəyini təsdiqləyən birgə bəyanata qoşulub. Danimarka, Norveç, Polşa, İspaniya və İsveçin də daxil olduğu ölkələr bu istiqamətdə əlavə tədbirlər görülməsini dəstəklədiklərini bildiriblər.
İsrail tərəfi isə Britaniyanın qərarına sərt reaksiya verib. İsrailin maliyyə naziri Bezalel Smotriç Britaniya səfirinin ölkədən çıxarılmasını tələb edib, milli təhlükəsizlik naziri İtamar Ben-Qvir isə Şərqi Qüdsdəki Britaniya konsulluğunun bağlanmasını istəyib.
