Cəmiyyət
Nazir: "Kənd təsərrüfatının daha sürətli, ağıllı və dayanıqlı transformasiyası zərurətə çevrilib"
İqlim dəyişikliklərinin torpaq və su ehtiyatlarına təzyiqi artırdığı bir şəraitdə kənd təsərrüfatı sektorunun daha sürətli, ağıllı və dayanıqlı transformasiyası zərurətə çevrilib.
Crossmedia.az xəbər verir ki, bu barədə kənd təsərrüfatı naziri Məcnun Məmmədov "Bakı İqlim Fəaliyyəti Həftəsi 2026 (BCAW 2026)"nın ikinci günündə bildirib.
Nazir qeyd edib ki, Azərbaycanın aqrar sektora baxışı məhsuldar, rəqabətqabiliyyətli, iqlimədavamlı və innovasiyalara əsaslanan inkişaf modelinə dayanır: "Bu strateji hədəflər dövlət başçısı tərəfindən təsdiq olunmuş "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı"nda da öz geniş əksini tapıb".
O vurğulanıb ki, ölkədə məhsuldarlıq və dayanıqlılıq bir-birini tamamlayan əsas istiqamətlərdir: "Dövlət Proqramına əsasən, 2030-cu ilədək müasir suvarma sistemlərinin tətbiq olunduğu ərazilərin təxminən 130 min hektardan 300 min hektara çatdırılması hədəflənir. Eyni zamanda, iqlim dəyişikliklərinə həssas regionlarda erkən xəbərdarlıq sistemlərinin yaradılması nəzərdə tutulur. Sektorun rəqəmsallaşdırılması çərçivəsində süni intellekt, peyk və məsafədən zondlama texnologiyaları, dronlar və sensorlardan geniş istifadəyə başlanılıb. Nazirliyin aqrar aləmdə Süni İntellekt Təşəbbüsü çərçivəsində müxtəlif mənbələrdən gələn məlumatların inteqrasiyası həyata keçirilir. Bu məqsədlə hazırda ölkə üzrə 180-dən çox meteoroloji və iqlim stansiyasının qurulması prosesi davam edir. Texnologiyanın real dəyəri onun fermer üçün sahədə praktik faydaya çevrilməsi, su ehtiyatlarından səmərəli istifadəyə və risklərin vaxtında idarə olunmasına imkan yaratmasıdır".
(Report)
10:32 08.09.2026
Oxunuş sayı: 54
