Çin bazarı Mərkəzi Asiyaya yeni maliyyə qapısı açır
Qlobal maliyyə bazarında şirkətlərin kapital cəlb etmək və səhmlərini yerləşdirmək üçün müxtəlif birjalara çıxış imkanları genişlənir. Bu proses beynəlxalq maliyyə sisteminə inteqrasiyanın dərinləşməsi və biznes subyektlərinin yeni investisiya imkanlarından yararlanması baxımından mühüm əhəmiyyət daşıyır. Xüsusilə Asiya maliyyə bazarlarının artan rolu şirkətlərin diqqətini bu istiqamətə yönəldir. Honq-Konq birjasının təqdim etdiyi çevik mexanizmlər isə investor və emitentlər üçün əlavə imkanlar yaradır. Bununla yanaşı, Çin bazarının geniş həcmi və inkişaf etmiş maliyyə-bank infrastrukturu beynəlxalq iqtisadi əməkdaşlıq üçün yeni perspektivlər açır. Ölkələrin müxtəlif ödəniş və bank sistemlərinə inteqrasiyası maliyyə şaxələndirilməsinə və beynəlxalq ticarət imkanlarının genişlənməsinə şərait yaradır. Xarici investisiyaların cəlb olunması və sənaye kooperasiyasının dərinləşdirilməsi də bu prosesin mühüm istiqamətlərindən biri kimi çıxış edir.
Mövzu ilə bağlı iqtisadçı ekspert Emin Qəribli Crossmedia.az-a açıqlamasında bildirib ki, qeydə alınan nəticələr ümumilikdə kifayət qədər müsbət dinamikanı əks etdirir:
“Prinsip etibarilə, müasir biznes subyektləri kapital cəlb etmək və səhmlərini yerləşdirmək üçün qlobal maliyyə bazarında istənilən birjaya üz tutmaq imkanına malikdirlər. Lakin mövcud mənzərə göstərir ki, Honq-Konq birjası şirkətlərin kapital bazarlarına inteqrasiyası üçün daha sadə, çevik və əlverişli mexanizmlər təklif edir. Bu da öz növbəsində həmin platformanı investorlar və emitentlər üçün daha cəlbedici edir. Eyni zamanda, Çin bazarı geniş həcmi və strateji imkanları ilə xüsusi diqqət çəkir. Çinin özü üçün də bu proses kifayət qədər əlverişlidir. Belə ki, ölkədə adekvat və inkişaf etmiş maliyyə-bank sistemləri mövcuddur. Çin bu imkanlardan istifadə edərək bir çox ölkələri öz maliyyə ekosisteminə cəlb edir ki, bu da ticarət əməliyyatlarında yerli bank və ödəniş sistemlərinin tətbiqinə şərait yaradır. Sözsüz ki, bu, tərəfdaş ölkələr üçün də son dərəcə müsbət haldır. Nəzərə almaq lazımdır ki, hər bir regionun ödəniş və bank strukturu fərqlidir. Ölkələrin eyni vaxtda həm Avropa və Amerika, həm də Çin ödəniş sistemlərinə inteqrasiya olunması maliyyə şaxələnməsini təmin edir və beynəlxalq ticarətdə geniş imkanlar açır. Bütün bunlarla yanaşı, xarici investisiyaların fəal şəkildə cəlb olunması, beynəlxalq əməkdaşlıq coğrafiyasının genişləndirilməsi və xüsusilə sənaye kooperasiyasının dərinləşdirilməsi müasir iqtisadi reallıqlarda strateji əhəmiyyət kəsb edən təqdirəlayiq bir yanaşmadır. Sənaye sahəsində institusional tərəfdaşlığın qurulması yalnız ayrı-ayrı şirkətlərin inkişafına deyil, bütövlükdə cəlb olunan sektorun rəqabət qabiliyyətinin və istehsal potensialının yüksəlməsinə təkan verir.”
Zeynəb Həsən
18:45 07.09.2026
Oxunuş sayı: 54
