İspan nəhəngi, “Qarabağ”ın forvardı Juninyonu transfer etməkdə qərarlıdır
“Sevilya” klubu, “Qarabağ”ın ulduz oyunçusu Juninyonu heyətinə qatmaq istəyir. İspaniya təmsilçisi, braziliyalı futbolçunun yüksək göstəriciləri və komandasına qatacağı dəyərdən faydalanmaq məqsədilə transfer danışıqları aparmağa başlayıb. Braziliyalı ulduzun “Qarabağ”dakı statistik göstəriciləri məhsuldar hesab olunur: “81 oyun, 41 qol, 14 assist.” Juninyonun “Qarabağ”dakı çıxışları, xüsusilə Avropa arenasında qazandığı təcrübə, “Sevilya” rəhbərliyinin diqqətini cəlb edib. Transferin reallaşması halında Juninyonun İspaniya La Liqasında yeni bir səhifə açacağı gözlənilir.
Tərəflər arasındakı danışıqların ilkin mərhələsində Əndəlüs klubu oyunçu üçün 2,5 milyon avro təklif etsə də, Ağdam klubu razılaşmayıb. İspan klubu ikinci təklifində Olavioya 3+1 milyon avro qiymət ölçüb. Komandalar arasında danışıqlar davam edir.
Transfer ilə bağlı rəsmi açıqlama olmasa da, İspaniyanın “Ficherio” nəşri transferin tamamlandığını yazıb.
Mövzu ilə bağlı CBC Sport kanalının şərhçilər qrupunun rəhbəri, idman jurnalisti, şərhçi Gündüz Abbaszadə Crossmedia.az-a açıqlama verib. Ekspert bildirib ki, “Qarabağ” artıq bir çox futbolçular üçün “trampilin”ə çevrilib. “Qarabağ”da oynayaraq nəhəng klubları cəlb etmək tendensiyası yaranıb.
Şərhçinin sözlərinə görə, Juninyonun “Sevilya” kimi böyük kluba transferi “Qarabağ”ın uğurudur:
“Əlbəttə ki, Juninyonu saxlamaq çox çətin olacaq. Braziliyalı forvard özü də bu təklifi geri çevirə bilməzdi. “Sevilya” kimi klubda oynamaq hər bir futbolçunun karyerasının başlanğıcında arzusudur. Hesab edirəm ki, bu transfer “Qarabağ”ın uğurudur. Ümid edirəm ki, gələcəkdə digər böyük klublar da “Qarabağ”ın oyunçuları ilə maraqlanacaq. Əgər bu gün “Sevilya” kimi transferlərinə həssaslıqla yanaşan klub Juninyonu transfer etmək istəyirsə, digər Avropa klubları da “Qarabağ”a üz tutacaq. Şübhəsiz ki, diqqət cəlb edən oyunçular arasında azərbaycanlı futbolçular da olacaq. Bu isə Azərbaycan futbolu üçün müsbət haldır.”
Qeyd edək ki, 2023-cü ilin yayında Ağdam klubuna keçən Juninyonun "Qarabağ"la müqaviləsi 2026-cı ilin iyununda başa çatacaq.
Nicat Rüstəmzadə
14:40 30.12.2024
Oxunuş sayı: 11714
