Gündəm,Hadisə

“Faiqoğlu” MMC sərnişinləri yox, öz cibini düşünür? – M1 marşrutunda narazılıq

Metronun “Elmlər Akademiyası” və “28 May” stansiyaları arasında fəaliyyət göstərən M1 nömrəli ekspres marşrutunda yaranmış vəziyyətlə bağlı şikayət var.

Crossmedia.az-ın məlumatına görə, marşrutlarda sərnişinlərin avtobuslara minməsi prosesini sürətləndirmək və gözləmə müddətini azaltmaq məqsədilə nəqliyyat vasitələrinə ikinci oxuma cihazı (validator) quraşdırılsa da, “Faiqoğlu” MMC-yə məxsus avtobuslarda arxa qapıdan sərnişinlərin girişinə icazə verilmir.

Bu gün səhər saat 08:30 radələrində qeydə alınmış videoda aydın şəkildə görünür ki, arxa qapı sərnişinlərin üzünə bağlanaraq yalnız ön qapıdan girişə icazə verilib.

Avtobus sürücüsündən bunun səbəbini soruşduqda bildirilib ki, buna səbəb arxa qapıdan minən bəzi sərnişinlərin ödənişdən yayınmasıdır. Görünür şirkət sürücülərə belə tapşırıq verərək bu “dərdlərinə” “çarə” tapıblar.

Analoji hal M1-in digər dayanacağı “Elmlər Akademiyası” metrostansiyasında da qeydə alınıb. Görüntülərdə əks olunub ki, avtobusun yalnız ön qapısı açıqdır.

Qeyd edək ki, bir müddət əvvəl M1 nömrəli ekspres marşrutunda yenilik tətbiq edilərək nəqliyyat vasitələrinə ikinci oxuma cihazının (validatorun) quraşdırılmasına başlanılmışdı. Bu, sərnişinlərin avtobuslara minməsi prosesini sürətləndirəcək və gözləmə müddətini azaldacaqdı.

Lakin görünür ki, “Faiqoğlu” MMC sərnişinləri yox, öz cibini düşünür. Sırf qazanc və ya digər mənafelər üçün sərnişinlərin rahat hərəkətinə maneə yaradır.

Əgər ikinci validatorun əsas məqsədi sərnişinlərin arxa qapıdan da daxil olaraq ödənişi həyata keçirməsi və avtobusa minmə prosesinin sürətləndirilməsidirsə, bu zaman həmin qapının sərnişinlərin üzünə bağlanmasının məntiqi izahı ortaya çıxır. Ödənişdən yayınma hallarının qarşısının alınması üçün başqa nəzarət mexanizmləri tətbiq edilə bilər. Lakin bunun əvəzində bütün sərnişinlərin arxa qapıdan girişinin məhdudlaşdırılması, xüsusilə səhər saatlarında, onsuz da sıx olan marşrutda əlavə narahatlıq yaradır.

Nəticədə ikinci validatorun tətbiqi ilə əldə olunması nəzərdə tutulan rahatlıq və vaxt qənaəti faktiki olaraq sual altında qalır. Sərnişinlər yenə yalnız ön qapıdan minməyə məcbur edilir, avtobus qarşısında növbə və sıxlıq yaranır.

Burada əsas sual isə budur: İkinci validator sərnişinlərin rahatlığını təmin etmək üçün quraşdırılıbsa, ondan istifadə imkanının məhdudlaşdırılmasının səbəbi nədir?