İsrail Qəzzada yaşlılar üçün xidmət göstərən xəstəxananı bombalayıb
İsrail ordusu Qəzza zolağında yaşlılar üçün reabilitasiya mərkəzi kimi fəaliyyət göstərən Vəfa xəstəxanasını hədəfə alıb. Hücum nəticəsində ilkin məlumata görə, 7 nəfər həlak olub.
Crossmedia.az Fələstinin rəsmi xəbər agentliyi WAFA-a istinadən xəbər verir ki, İsrail qüvvələri Qəzza şəhərinin cənubundakı Zəhra bölgəsində yerləşən Vəfa xəstəxanasını bombalayıb. Hücum nəticəsində 7 nəfər həlak olub. Bəziləri ağır olmaqla bir neçə nəfər yaralanıb.
Qeyd edək ki, 1980-ci ildə yaradılan Vəfa Yaşlılara Qayğı Mərkəzi Qəzza zolağında yaşlıların sığınması və qayğısına qalmaq üzrə yeganə xəstəxana kimi tanınır. İsrail ordusu 2023-cü ilin noyabr ayında da həmin xəstəxananı bombalamışdı. Hücum zamanı xəstəxananın müdiri Mitat Muhaysin həyatını itirib. Bəzi həkimlər və xəstələr yaralanmışdı.
İsrailin 7 oktyabr 2023-cü ildən bəri Qəzza Zolağına təşkil etdiyi hücumlarda indiyə qədər 17 492-si uşaq, 11 979-u qadın olmaqla ümumilikdə 45 484 fələstinli həyatını itirib. 108 090 nəfər yaralanıb. Dağıntılar altında hələ də minlərlə nəfərin olduğu bildirilir. Xalqın sığındığı xəstəxana və təhsil ocaqları hədəfə alınaraq, mülki infrastruktur məhv edilir.
Fidan Hacızadə
11:47 29.12.2024
Oxunuş sayı: 3032
