BILD: Raketlər sərnişin təyyarələri üçün əsas təhlükələrdən birinə çevrilib
Son onilliklərdə aviasiya daha təhlükəsiz olsa da, yeni ciddi təhdid yaranıb — hava hücumundan müdafiə raketləri.
Crossmedia.az xarici KİV-ə istinadən xəbər verir ki, bu təhlükəni Qazaxıstanda baş vermiş faciə bir daha təsdiqləyir. Bild-in məlumatına görə, Azərbaycan Hava Yollarına şirkətinə məxsus təyyarə, ehtimallara əsasən, Rusiya raketi ilə vurulub. Nəticədə, Embraer E190 təyyarəsinin 67 sərnişinindən 38-i həlak olub.
Flight Safety Foundation-un qlobal məlumat bazasına görə, bu, 2014-cü ildən bəri münaqişə zonasında sərnişin təyyarələrinin vurulması ilə bağlı artıq üçüncü hadisədir. Bu cür insidentlər nəticəsində 500-dən çox insan həyatını itirib. Ekspertlər qeyd edirlər ki, təsadüfi atəş riski əhəmiyyətli dərəcədə artıb.
Virgin Atlantic şirkətinin keçmiş təhlükəsizlik məsləhətçisi Endi Blekuell xəbərdarlıq edir:
“İndi sərnişin təyyarələri, xüsusilə obyektlərin düzgün tanınmaması səbəbindən vurula bilər. Bu, 2014-cü ildə baş vermiş hadisədə olduğu kimi baş verə bilər. O zaman Rusiya raketi Malaziya Hava Yolları şirkətinə məxsus Boeing 777 təyyarəsini Ukraynanın şərqində vurmuş və 298 nəfərin həyatına son qoymuşdu.”
Gültac Mehdizadə
16:10 28.12.2024
Oxunuş sayı: 16483
