Şimali Koreya da müharibəyə qoşulur: Rusiya-Ukrayna savaşı uzandıqca uzanır
Ukrayna Prezidenti Volodimir Zelenskinin məlumatına görə, Rusiya Zaporojyeyə endirdiyi son zərbələr zamanı Şimali Koreya istehsalı ballistik raketlər, “Sirkon” raketləri və idarəolunan aviasiya bombalarından istifadə edib. Hücum nəticəsində Zaporojyedə 6 nəfərin öldüyü, 19 nəfərin yaralandığı bildirilir.
Zelenski bildirib ki, Donetsk, Dnepropetrovsk və Nikolayev vilayətləri də zərbələrə məruz qalıb və Ukrayna ərazisinə 120-dən çox dronla hücum edilib. Ukrayna Prezidenti bu hücumları Rusiyanın hərbi eskalasiyaya hazırlaşdığının göstəricisi kimi qiymətləndirib.
Politoloq Asif Nərimanlı Crossmedia.az-a açıqlamasında bildirib ki, Rusiyanın Şimali Koreya istehsalı olan silahlardan istifadə etməsinin əsas səbəblərindən biri hərbi arsenalında yaranan çatışmazlıqlardır:
“Rusiyanın Şimali Koreya istehsalı olan silahlardan, hücumlarda bu silahlardan istifadə etməsi əslində iki əsas səbəbdən qaynaqlanır. Birincisi, bu, Rusiyanın hərbi arsenalının müharibə zamanı tükəndiyini, daha doğrusu, müəyyən bir çatışmazlıqla üzləşdiyini göstərir. Bilirik ki, müharibənin ilk dövründə Rusiya sırf öz hərbi arsenalı ilə müharibə aparırdı. Daha sonra isə müxtəlif mənbələrə üstünlük verməyə başladı və Şimali Koreya da bu mənbələrdən biridir, əsas silah aldığı mənbələrdən biridir”.
A.Nərimanlı Rusiyanın xüsusilə Şimali Koreyadan əldə etdiyi ballistik raketlərdən istifadə etdiyini qeyd edib:
“Bununla Rusiya müharibənin gedişində hərbi arsenalındakı çatışmazlıqları qarşılamağa çalışır. Xüsusən Şimali Koreyadan aldığı ballistik raketlərdən geniş şəkildə istifadə edir. Rusiya Ukraynanın dərinliklərini vurmaq məqsədilə bu silahlardan istifadə edir. Ukrayna tərəfi xüsusən son vaxtlar dron taktikasını genişləndirdikdən sonra Rusiyanın hərbi zavodlarına, hərbi sənaye zavodlarına ciddi zərbələr vurub. Bu da Rusiyanın müharibənin gedişində hərbi təchizatını yenidən bərpa etmək imkanlarını zəiflədir”.
Politoloq bildirib ki, Rusiyanın xarici mənbələrdən silah əldə etməsi hərbi təchizatdakı çatışmazlıqları kompensasiya etmək cəhdi kimi qiymətləndirilə bilər:
“Buna görə də Rusiya artıq digər ölkələrdən, Şimali Koreya da daxil olmaqla, xarici mənbələrdən aldığı silahlardan daha çox istifadə etməyə başlayıb. Rusiya bu çatışmazlıqları xarici mənbələr hesabına aradan qaldırmaq istəyir. Bu hücumda Şimali Koreya silahlarından istifadə olunması da buna deməyə əsas verir”.
A.Nərimanlı Rusiyanın xarici silahlardan istifadəsinin müharibəni davam etdirmək niyyətindən də xəbər verdiyini vurğulayıb:
“İkinci əsas səbəb isə, təbii ki, bunun Rusiyanın müharibəni davam etdirmək, təslim olmamaq niyyətində olduğunu göstərməsidir. Daha uzunmüddətli bu prosesi, müharibəni davam etdirmək niyyətindədir. Yəni öz istədiyinə nail olana qədər davam etdirmək istədiyini göstərir”.
Politoloq qeyd edib ki, Rusiyanın hərbi təchizatında yaranan zəifləmə onun danışıqlar masasına gələcəyi ilə bağlı gözləntiləri artırsa da, Moskva hələlik alternativ silah mənbələri hesabına müharibəni davam etdirir:
“Ukraynanın zərbələri və müharibənin gedişində Rusiyanın hərbi arsenalı, hərbi təchizatı zəiflədikcə Rusiyanın danışıqlar masasına gələcəyi və burada bəlli şərtlərlə razılaşacağı gözləntiləri artır. Bu gözləntilər əvvəllər də olub, bu gün də var. Amma Rusiya görünür ki, danışıqlar masasında istədiyi şərtlərə tam yetişməyənə qədər müharibəni davam etdirmək niyyətindədir və xarici mənbələrdən aldığı silahlardan istifadə etməklə də bunu nümayiş etdirir”.
A.Nərimanlı hesab edir ki, Rusiya daxili istehsal hərbi təchizatdakı çatışmazlığı tam aradan qaldıra bilməsə belə, alternativ mənbələr hesabına müharibəni davam etdirməyə çalışır:
“Bu, o deməkdir ki, Rusiyanın daxili istehsalı hərbi təchizatındakı çatışmazlığı aradan qaldıra bilməsə də, Rusiya alternativ mənbələr taparaq bu müharibəni davam etdirmək niyyətindədir. Təbii ki, Rusiyanın əsas hədəfi müharibənin gedişində dəyişibsə də, Donbasla bağlı olan əsas hədəf dəyişmir. Xüsusən Ukraynanın neytrallıq statusu, NATO-nun genişlənməməsi və Donbasın tamamilə Rusiyanın nəzarətinə keçməsi ilə bağlı hədəfləri var”.
Politoloq bildirib ki, Moskva döyüş meydanındakı mövqelərini qorumaq və danışıqlar masasında əlini gücləndirmək üçün xarici silahlardan istifadəni davam etdirə bilər:
“Rusiya artıq anlayır ki, bunu müharibə ilə tam təmin etmək çətindir. Ona görə də ən azı döyüş meydanında öz mövqelərini qorumaq və Ukraynaya daha çox hücum etməklə danışıqlar masasında əlini gücləndirmək və bu şərtlərə uyğun razılaşmanı əldə etməyə çalışır. Bunun üçün də, dediyim kimi, xarici mənbələrdən aldığı silahlardan geniş şəkildə istifadə edir”.
Nigar Xəlilli
20:30 12.08.2026
Oxunuş sayı: 45
