Araqçının çox müzakirə olunan bəyanatının "kodları": O, əslində bunu etiraf etdi...
İranın xarici işlər naziri Abbas Araqçının 40 günlük müharibə dövründə Türkiyənin Şimali İraqdan kürd silahlı qruplarının İrana keçidinin qarşısını aldığına dair açıqlaması Yaxın Şərqdə regional güclər arasındakı münasibətlərə yeni baxış formalaşdırıb. Tehranın bu bəyanatı təkcə keçmiş hadisələrə münasibət deyil, həm də Ankara ilə təhlükəsizlik əməkdaşlığı, ABŞ-ın regiondakı rolu və dəyişən geosiyasi balansla bağlı mühüm siyasi mesaj kimi qiymətləndirilir.
Politoloq Oqtay Qasımov Crossmedia.az-a açıqlamasında bildirib ki, İranın xarici işlər naziri Abbas Araqçının Türkiyənin rolu ilə bağlı son açıqlamaları regiondakı geosiyasi proseslər baxımından diqqətçəkən mesajdır.
Ekspertin sözlərinə görə, Türkiyə İran ətrafında baş verən gərginlik dövründə mühüm rol oynayıb və bu, artıq İran rəsmiləri tərəfindən də etiraf edilir:
"Türkiyə münaqişə dövründə həm gərginliyin azaldılması istiqamətində səylər göstərdi, həm də İranın şimal sərhədlərindən silahlı qrupların ölkəyə keçməsinin qarşısının alınmasında mühüm rol oynadı. Bu amil İran daxilində mümkün parçalanma və daxili qarşıdurma risklərinin azalmasına təsir göstərdi".
O.Qasımov qeyd edib ki, İranın daha rasional mövqe tutan siyasi dairələri həm Türkiyənin, həm də Azərbaycanın bu prosesdə oynadığı rolu müsbət qiymətləndirirlər:
"İranda müəyyən siyasi elita nümayəndələri hesab edirlər ki, həm Türkiyə, həm də Azərbaycan öz ərazilərinin İrana qarşı istifadə edilməsinə imkan verməyiblər. Bu, Tehran tərəfindən müsbət qarşılanan mühüm məqamlardan biridir".
Politoloqun fikrincə, Abbas Araqçının açıqlamaları Türkiyənin regiondakı rolunun etirafı kimi qiymətləndirilə bilər:
"Bu bəyanat Türkiyənin regional əhəmiyyətinə verilən qiymət kimi qəbul oluna bilər. Lakin bunun İran-Türkiyə münasibətlərində qısa müddətdə köklü dönüş yaradacağını söyləmək çətindir".
Ekspert vurğulayıb ki, Tehran-Ankara münasibətlərində strateji rəqabət amili hələ də qalmaqdadır:
"İranın regional siyasətində Türkiyənin təsirini balanslaşdırmaq mühüm istiqamətlərdən biri olaraq qalır. Eyni zamanda, ölkə daxilində Türkiyənin güclənməsini istəməyən dairələr də mövcuddur. Buna görə də, bu açıqlamaların əhəmiyyətinə baxmayaraq, yaxın perspektivdə İran-Türkiyə münasibətlərində ciddi və radikal dəyişiklik gözləmirəm".
Nigar Xəlilli
18:00 21.07.2026
Oxunuş sayı: 66
