Lerikin illərlə dəyişməyən problemi: Sakinlər hələ də avtobus gözləyir
Bölgələrdə xüsusən də ucqar rayonlarda sərnişin daşınmalarında ciddi problemlər var. Hətta bəzi rayonlarda daxili avtobuslar yoxdur. Bu rayonlardan biri də Lerikdir. Belə ki, Lerik rayonunda şəhər daxili və kəndlər arası marşrut xətləri təşkil edilməyib. Avtobus dayanacaqları olsa da, o dayanacaqda gözləyən sərnişinlərə xidmət edəcək avtobus yoxdur. Bu da xüsusən məktəblilər üçün eləcə də sakinlərin nəqliyyat problemi yaşamasına səbəb olur. 21-ci əsrdə hələ də avtobussuz qalan rayonlarımızın olması nəqliyatdakı ciddi nöqsanlardan biridir.
Məsələ ilə bağlı Azərbaycan Yerüstü Nəqliyyat Agentliyi(AYNA) Crossmedia.az-ın sorğusuna cavab olaraq bildirib ki, hazırda rayon ərazisinin relyefi və hava şəraiti nəzərə alınmaqla daşıyıcılar tərəfindən həmin ərazidə sərnişindaşıma xidmətlərinin göstərilməsi cəlbedici deyil. Qurum qeyd edib ki, daşıyıcıların sərnişindaşıma fəaliyyətinə cəlb edilməsi istiqamətindən işlər aparılır.
Bu işlər necə və nə zaman nəticə verəcəyi isə məlum deyil.
Mövzu ilə bağlı nəqliyyat eksperti Elməddin Muradlı isə bildirib ki, avtobusların fəaliyyəti ilə bağlı bölgələrdə vəziyyət elə də yaxşı deyil:
“AYNA tərəfindən indi-indi müəyyən müsabiqələr keçirilir. Regionlarda sərnişin daşınmaların təşkili ilə bağlı müəyyən addımlar atılır. Hesab edirəm ki bu hələ xeyli zaman aparacaq. Çünki indiyə kimi bu sahədə ciddi bir fəaliyyət olmayıb. Rayon sakinləri köhnə avtobusların ümidinə qalıb. Bir gün içində bu məsələ həll olunması mümkün deyil. Həll üçün aylar, illər lazım olacaq. Bölgələr, xüsusən ucqar rayonlar təəsüf ki, indiyə qədər unudulub. Bəzi insanlar da bundan istifadə edib, Bakıdan köhnə avtobus alıb, dağılana qədər rayonlarda istismar ediblər. Ancaq özlərini, ciblərini düşünüblər. Sərnişinlərin rahatlığı nəzərə alınmayıb. İndi sistemli şəkildə iş başlayıb. Düzdür, bu vaxt aparacaq. Amma ümid edirəm ki, öhtəsindən gəlmək mümkün olacaq”.
Araşdırmamızdan bəlli olur ki, rayonlarımızın avtobus problemi gec də olsa yada düşüb. Amma bu prosesin nəticəsini gözləmək üçün çoxlu səbr lazımdır.
14:30 18.07.2026
Oxunuş sayı: 90
