Sabahdan "Koroğlu" NMM-i "Sea Breeze" ilə əlaqələndirən ekspres marşrutu fəaliyyətə başlayır
Yay günlərində paytaxtdan ətraf qəsəbələrə, o cümlədən çimərlik ərazilərinə sərnişin axınının artması nəzərə alınaraq iyulun 18-dən "Koroğlu" Nəqliyyat Mübadilə Mərkəzini "Sea Breeze" istirahət mərkəzi ilə əlaqələndirən 150E nömrəli ekspres marşrutunun fəaliyyəti bərpa olunur.
Bu barədə Crossmedia.az Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyinə (AYNA) istinadən xəbər verir.
Məlumata əsasən, həftənin şənbə və bazar günləri metronun "Koroğlu" stansiyasının cənub çıxışından ("Piramida" tərəf) başlanğıcını götürən avtobusların marşrut boyu bir neçə aralıq məntəqədə dayanması təmin ediləcək.
Marşrut üzrə aralıq dayanacaqlar bunlardır: Heydər Əliyev prospekti (Yerüstü piyada keçidi, Bakıxanov qəsəbəsi); Bakı Ekspo Mərkəzi (Yeni Suraxanı qəsəbəsi); Mərdəkan prospekti (Binə qəsəbəsi); Mərdəkan prospekti (Qala yolu ilə kəsişmə); 5 nömrəli Bakı Peşə Məktəbi (Buzovna qəsəbəsi); Bilgəh Kardioloji Sanatoriyası; Bilgəh–Pirşağı yolu (çimərlik ərazisi); Sea Breeze 1; Sea Breeze 2.
Böyüktutumlu avtobuslar sərnişinlərə saat 07:00-dan 22:00-dək 30 dəqiqə hərəkət intervalı ilə xidmət göstərəcək. Avtobuslarda ödəniş nağdsız qaydadadır. Gedişhaqqı 0,90 manat müəyyən edilib.
12:36 17.07.2026
Oxunuş sayı: 49
