Qarabağda İlham Əliyevin rəhbərliyi ilə görülən işlər öz nəticələrini göstərir
Prezident İlham Əliyevin Qarabağ və Şərqi Zəngəzura mütəmadi səfərləri işğaldan azad edilmiş ərazilərdə aparılan bərpa və yenidənqurma işlərinə dövlət səviyyəsində verilən xüsusi diqqətin bariz nümunəsidir. Xüsusilə dövlət başçısının iyulun 11-də Laçına etdiyi növbəti səfər çərçivəsində yeni infrastruktur layihələrinin təməlqoyma və açılış mərasimlərində iştirak etməsi, həyata keçirilən işlərlə yerində tanış olması və yeni tapşırıqlar verməsi “Böyük Qayıdış” proqramının ardıcıl və planlı şəkildə icra olunduğunu bir daha göstərdi. Ümumilikdə, Qarabağ və Şərqi Zəngəzurun dirçəldilməsi, müasir yaşayış məntəqələrinin qurulması, iqtisadi potensialın reallaşdırılması və keçmiş məcburi köçkünlərin doğma yurdlarına təhlükəsiz qayıdışının təmin edilməsi Azərbaycanın əsas dövlət prioritetlərindən biri olaraq qalır.
Milli Məclisin deputatı Elman Nəsirov Crossmedia.az-a açıqlamasında qeyd edib ki, Müzəffər Ali Baş Komandan, Prezident İlham Əliyevin rəhbərliyi altında yenilməz Ordumuz və dəmir yumruğa çevrilmiş xalqımız tarixi missiyanı – torpaqlarımızın işğaldan azad edilməsi, dövlət suverenliyimizin tam və qəti şəkildə bərpası vəzifəsini uğurla yerinə yetirdi: “Bundan sonra dövlətimizin qarşısında duran növbəti strateji vəzifə Qarabağ və Şərqi Zəngəzurun bərpası və yenidən qurulmasıdır. Bu istiqamətdə mühüm addımlar atılıb və bu proses uğurla davam etdirilir. İlk növbədə, güclü siyasi iradə mövcuddur. Eyni zamanda, ölkəmizin kifayət qədər maliyyə resursları, peşəkar kadr potensialı və dost ölkələrin dəstəyi var. Bütün bunlar Qarabağ və Şərqi Zəngəzurun yenidən qurulması, ölkə iqtisadiyyatına tam inteqrasiyası və tarixi yurdlarımıza Böyük Qayıdışın uğurla həyata keçirilməsi üçün unikal imkanlar yaradır. Bu məqsədlə dövlət büdcəsindən artıq 15 milyard ABŞ dollarından çox vəsait ayrılıb. İnfrastruktur layihələrinin ilk mərhələdə tam həyata keçirilməsi üçün isə əlavə 18 milyard ABŞ dollarına qədər vəsaitin xərclənməsi nəzərdə tutulur”.
Deputat qeyd edib ki, “Böyük Qayıdış” proqramı çərçivəsində də mühüm işlər görülür: “Artıq 85 mindən çox soydaşımız işğaldan azad olunmuş ərazilərdə yaşayır, işləyir və təhsil alır. Paralel olaraq həmin ərazilərin mina təhlükəsindən təmizlənməsi prosesi də davam etdirilir. Bütün bu proseslər birbaşa Prezident İlham Əliyevin nəzarəti altındadır. Dövlət başçısı mütəmadi olaraq Qarabağ və Şərqi Zəngəzura səfərlər edir, aparılan quruculuq işləri ilə yerində tanış olur, müvafiq tapşırıqlar verir və bərpa prosesini daim nəzarətdə saxlayır. Bunun nəticələri artıq özünü aydın şəkildə göstərməkdədir. Qarabağ və Şərqi Zəngəzur yaşıl enerji zonası elan olunub və bu istiqamətdə genişmiqyaslı layihələr həyata keçirilir. Prezident İlham Əliyevin iyulun 11-də Laçın, Şuşa, Xocavənd və Xankəndiyə səfərləri də bir daha nümayiş etdirdi ki, Qarabağ sürətlə dirçəlir, yenidən qurulur və əvvəlkindən də gözəl simasına qovuşur”.
E.Nəsirov qeyd edib ki, həmin səfər çərçivəsində mühüm infrastruktur layihələrinin də təməli qoyuldu: “O cümlədən, böyük su anbarının tikintisinə start verildi. Təxminən 100 milyon kubmetr tutuma malik olacaq bu su anbarı gələcəkdə Laçın və ətraf rayonların, eləcə də digər azad olunmuş ərazilərin su təminatında mühüm rol oynayacaq. Qarabağ və Şərqi Zəngəzurun yaşıl enerji potensialı da olduqca böyükdür. Regionun təxminən 10 giqavat həcmində yaşıl enerji imkanlarına malik olduğu qiymətləndirilir ki, bu da Azərbaycanın enerji strategiyası baxımından xüsusi əhəmiyyət daşıyır. Prezident İlham Əliyevin rəhbərliyi və birbaşa nəzarəti altında həyata keçirilən bütün bu işlər artıq öz real nəticələrini verməkdədir. Bu gün bütün dünya şahiddir ki, Azərbaycan qurucu dövlətdir. Azərbaycan yaradır, bərpa edir, inkişaf etdirir və regionda sülhün, sabitliyin və əmin-amanlığın təmin olunmasına mühüm töhfə verir”.
Ayhan
10:30 13.07.2026
Oxunuş sayı: 50
