Mövsüm başladı: Çimərliklərdə vəziyyət necədi? - Reportaj
Amansız yay istisi insanları dəniz kənarına, xüsusən də Abşeronun məşhur Novxanı çimərliklərinə səsləyir. Temperatur yüksəldikcə, mavi sulara pənah gətirənlərin sayı da artır. Bu gün biz də bu böyük insan selinə qoşulub, Novxanı sahillərindəki real mənzərəni, dənizin builki vəziyyətini və ən əsası – təhlükəsizlik tədbirlərini yerindəcə müşahidə etdik.
Çimərliyə addım atan kimi bizi ard-arda düzülmüş kölgəliklər, masalar və böyük bir insan izdihamı qarşılayır. Kimi dəniz havasında nahar edir, kimi günəşlənir, kimi də qum üzərində yay istisinin dadını çıxarır. Sahilboyu fəaliyyət göstərən restoranlar musiqi sədaları ilə dəniz eyforiyasını tamamlayır.
Ancaq builki mənzərədə ən diqqətçəkən məqamlardan biri dənizin xeyli geriyə çəkilməsidir. Suların geri çəkilməsi nəticəsində restoranlarla sahil xətti arasında kifayət qədər böyük bir məsafə yaranıb. Dəniz suyunun təmizliyinə gəlincə, su nisbətən təmiz görünsə də, ona tam mənada "şəffaf" demək çətindir. Çimərlik idarəçiləri suyu təmizləmək üçün adətən xüsusi xlorlu daşlardan istifadə etsələr də, dənizə təmiz demək olmur.
Bu qaynar mənzərəni tamamlayan isə illərdir dəyişməyən çimərlik koloriti – ətrafa yayılan təzə bişmiş peraşki və isti qarğıdalı qoxusudur. Satıcıların səsi dalğa səslərinə qarışaraq sahildə özünəməxsus bir ritm yaradır.
Dənizdə azyaşlılara həm valideynləri həm də çimərlik nəzarətçiləri xüsusi diqqət edir, özbaşına suya girməyə qoymurlar. Azyaşlılar üçün çimərliyin girişində kiçik park salınıb.
Son illərdə dənizdə baş verən bədbəxt hadisələrin və boğulma hallarının statistikasının artması, builki çimərlik mövsümündə həm dövlət qurumlarını, həm də vətəndaşları daha diqqətli olmağa məcbur edib. Novxanı sahillərində sevindirici hal odur ki, təhlükəsizlik qaydalarına ciddi riayət olunur.
Sol tərəfə nəzər salanda Fövqəladə Hallar Nazirliyinin (FHN) xilasedici qayığı və peşəkar xilasedicilər gözə dəyir. Demək olar ki, buradakı əksər çimərliklərdə bu cür qayıqlar və suda sərhədləri müəyyən edən xəbərdarlıq şarları mövcuddur.
Ən maraqlı müşahidəm isə insanların davranışları ilə bağlıdır. Sahilin kənar, nəzarətsiz hissələrində demək olar ki, heç kim çimmir. Hamı sanki bir yerə toplaşaraq, xilasedicilərin gözü qarşısında, toplu şəkildə dənizə girir. İnsanlar daha ehtiyatlıdırlar, dərinliyə doğru addımlamağa tələsmirlər. Şübhəsiz ki, bu, acı təcrübələrdən doğan və boğulma qorxusunun diktə etdiyi bir "təhlükəsizlik instinkti"dir. İnsanlar artıq dənizlə zarafat etməyin bədəlini yaxşı anlayırlar.
Novxanı çimərliyindən ayrılarkən bir daha əmin oluruq: yay istisindən qorunmağın və dənizin dadını çıxarmağın ən doğru yolu məhz FHN xilasedicilərinin, xəbərdarlıq nişanlarının olduğu təhlükəsiz məkanlara üz tutmaqdır. Çünki dəniz nə qədər cəlbedici və sərinləşdirici olsa da, yalnız qaydalara hörmət edənlərə qarşı mehribandır. Özünüzü və sevdiklərinizi qoruyun ki, yay xatirələriniz yalnız xoş anlarla yadda qalsın.
Ayhan
19:58 10.07.2026
Oxunuş sayı: 66
