Rusiya Ermənistanı “əldən vermək” istəmir – yeni əməkdaşlıq başlayır
Rusiyanın dövlət nüvə korporasiyası “Rosatom” Ermənistanda enerji çatışmazlığının aradan qaldırılması üçün böyük və ya orta gücə malik atom elektrik stansiyasının (AES) tikintisini təklif edib. Ermənistanda hazırda da atom elektrik stansiyası olan “Metsamor” stansiyası fəaliyyət göstərir. Və bu stansiyanın fəaliyyəti bir sıra cəhətləri ilə qonşu dövlətlərdə narazılıqlar yaratmışdı. Nəzərə almaq lazımdır ki, emissiya tullantıları ekologiyaya ciddi ziyan vurur və Ermənistan kimi “dinc durmağı bacarmayan” bir dövlət ərazisində bu cür təhlükəli layihənin icrası qonşu dövlətlərdə də narahatlıq yaradır.
Mövzu ilə bağlı Crossmedia.az-a açıqlama verən politoloq Zərdüşt Əlizadə qeyd edib ki, Ermənistan ərazisində atom elektrik stansiyası tikərkən qonşu dövlətlərin rəyini almaya bilər: “Çünki onun ərazisində 50 ildən çoxdur ki, elektrik stansiyası işləyir. Hələki heç bir problem olmayıb. Hətta Ermənistanda zəlzələ olduqda belə həmin stansiyada təhlükəli vəziyyət yaranmadı. Amma digər tərəfdən Ermənistan çalışır ki, Rusiyadan asılılığını azaltsın. Atom elektrik stansiyası heç də ucuz layihə deyil. Xatırlatmaq istəyirəm ki, Rusiya öz hesabına Türkiyə ərazisində atom elektrik stansiyasının tikintisində ilkin yatırıma 20 milyard dollardan çox vəsait ayırdı. İndiki şəraitdə də Rusiyanın belə bir büdcəsi yoxdur ki, onu Ermənistanda atom elektrik stansiyasına xərcləsin. Həmçinin Rusiya istəmir ki, başqa dövlətlər Ermənistanda bu layihə ilə təsirini gücləndirsin. Ona görə də Rusiya danışıqlar apararaq, ümid verməyə çalışır. Az xərclə Ermənistanı özlərinə bağlı saxlayaraq vəd edirlər ki, nə vaxtsa bu elektrik stansiyasını tikəcəklər”.
Politoloq qeyd edib ki, digər tərəfdən ABŞ-də Ermənistan ərazisində atom elektrik stansiyası tikmək istəyir: “İlkin təklif ondan ibarət olub ki, əvvəlcə kiçik stansiya tikilsin, daha sonra zərurət yaranarsa, ikinci stansiya da tikilər. Ermənistan indi seçim qarşısında qalıb. Bir tərəfdə bütün imkanları tükənmiş və boş vədlər verən Rusiya var, digər tərəfdə isə ABŞ. Amma Ermənistan ABŞ-ə icazə versə Rusiya ilə də münasibətləri kəskin şəkildə pozulacaq. Hazırda Ermənistan Rusiya ilə danışıqları aparır, ABŞ-ə də yox demir. ABŞ-də hazırda Ermənistana təzyiq göstərə bilmir ki, hansısa qərar versin. Hazırda Rusiyanın konkret üstünlüyü Ermənistanda Sovet layihəsi olan atom elektrik stansiyasının uğurla işləməsidir”.
Ayhan
15:00 08.07.2026
Oxunuş sayı: 53
