Rusiya Ukrayna müharibəsində yeni cəbhə - Avropa məsələyə qarışdı
Son günlər Rusiya-Ukrayna müharibəsində yeni cəbhələrin açılması ehtimalı ilə bağlı müzakirələri yenidən gündəmə gətirib. Belarusun bu prosesdə hansı mövqe tutacağı beynəlxalq siyasətdə ən çox müzakirə olunan məsələlərdən biridir. Prezident Aleksandr Lukaşenkonun Belarus hərbçilərinin Ukrayna münaqişə zonasına göndərilməyəcəyini bir daha bəyan etməsi də bu müzakirələri daha da aktuallaşdırıb. Bununla yanaşı, Belarusun Rusiya ilə müttəfiq münasibətləri və NATO-nun regiondakı fəallığı diqqət mərkəzindədir. Ekspertlər hesab edirlər ki, mövcud geosiyasi proseslərin inkişafı Belarusun gələcək addımları baxımından xüsusi əhəmiyyət daşıyır.
Mövzu ilə bağlı Crossmedia.az-a danışan politoloq Tofiq Abbasov bildirib ki, hazırda NATO-nun Ankara sammiti fonunda Rusiya əleyhinə yeni ittihamlar səsləndirilir: "Qərbdə anti-Rusiya mövqeyi güclənir və Şərqi Avropada gərginliyin artırılması istiqamətində addımlar atılır. Daha əvvəl Rusiyaya məxsus olduğu iddia edilən bəzi pilotsuz uçuş aparatlarının ekspertizası zamanı onların komponentlərinin İsveç istehsalı olduğu müəyyənləşmişdi. Bu isə regionda müxtəlif təxribat ssenarilərinin qurulduğunu göstərir. Belarus isə açıq şəkildə bəyan edir ki, bu münaqişədə bitərəf qalmaq niyyətindədir. Bununla yanaşı, əgər müharibənin coğrafiyası genişlənər və Belarus prosesə cəlb olunarsa, Minskin Rusiya ilə müttəfiq dövlət olması da nəzərə alınmalıdır. Bununla belə, Aleksandr Lukaşenko çalışır ki, münaqişə daha da böyüməsin və Rusiya ilə Ukrayna arasında danışıqlar başlasın".
Politoloq qeyd edib ki, hətta Belarus bu danışıqlar üçün öz platformasını təqdim etməyə hazır olduğunu da bəyan edib: Politoloq bildirib ki: ˝Qərbin mövqeyi isə fərqlidir və müharibənin dayanmasında maraqlı görünmür. Hazırda Kiyev yenidən silah və sursat çatışmazlığından danışaraq Qərbdən əlavə hərbi yardım istəyir. Ankara sammitində qəbul ediləcək qərarlar da gələcək strategiyanın necə olacağını göstərəcək. ABŞ Prezidenti Donald Tramp müharibənin əleyhinə olduğunu desə də, ABŞ siyasi elitasında anti-Rusiya mövqeyinin güclü olaraq qalır. Vaşinqtonda Rusiyanın zəiflədilməsi istiqamətində yanaşmalar üstünlük təşkil edir. Belarusun öz təşəbbüsü ilə müharibəyə qoşulacağı inandırıcı görünmür. Aleksandr Lukaşenko daha çox praqmatik və rasional siyasət yürüdərək sülh çağırışlarını davam etdirir. Baxmayaraq ki, üçüncü qüvvələr Belarusu bu qarşıdurmaya cəlb etməyə çalışa bilərlər, Minskin bu cəhdləri qəbul edəcəyi ehtimalı aşağı qiymətləndirilir".
Zeynəb Həsən
20:30 07.07.2026
Oxunuş sayı: 47
