Ukrayna Rusiyanın “Axilles dabanını” hədəf alıb: Rəsmi Moskva üçün sonun başlanğıcı
Bu günlərdə Ukrayna Rusiyanın iki S-400, radiolokasiya stansiyasına və neft bazasına zərbə endirib. Dövrün vəziyyətini təhlil edərkən diqqət etmək lazımdır ki, müasir müharibələrin taleyi təkcə cəbhə xəttindəki toqquşmalarla deyil, həm də arxa cəbhənin nə dərəcədə qorunması və logistik zəncirin davamlılığı ilə ölçülür. Ukraynanın son dövrlərdə Rusiyanın strateji hava hücumundan müdafiə sistemlərinə və yanacaq infrastrukturuna endirdiyi nöqtəvi zərbələr döyüş meydanındakı status-kvonu sarsıtmaq potensialına malik mühüm gedişlərdir. Lakin bu lokal uğurların böyük müharibənin gedişatını tamamilə dəyişib-dəyişməyəcəyi sualı hələ də hərbi analitiklərin diqqət mərkəzindədir. Çünki qlobal miqyaslı bir münaqişədə ayrı-ayrı taktiki qələbələr həlledici görünsə də, yekun nəticə tərəflərin ümumi resursları, dözümlülüyü və strateji dərinliyi ilə müəyyən olunur.
Məsələnin mahiyyəti və Rusiya-Ukrayna müharibəsinin taleyi ilə bağlı hərbi ekspert Anar Şuşalı Crossmedia.az-a açıqlama verib: "Bu cür zərbələrin artması müharibənin gedişatına müəyyən təsir göstərə bilər, lakin təkbaşına müharibənin nəticəsini dəyişəcəyini demək çətindir. İki hava hücumundan müdafiə sisteminin (S-400 komplekslərinin) və radiolokasiya stansiyalarının sıradan çıxarılması həmin istiqamətdə Rusiyanın hava məkanına nəzarət imkanlarını zəiflədə, Ukraynanın pilotsuz uçuş aparatları və uzaqmənzilli zərbə vasitələri üçün daha əlverişli şərait yarada bilər. Neft bazalarının vurulması isə Rusiyanın hərbi logistikasına və yanacaq təminatına əlavə təzyiq göstərir.
Bununla belə, Rusiyanın geniş hərbi-sənaye bazası və ehtiyatları nəzərə alınarsa, ayrı-ayrı uğurlu zərbələr strateji dönüş yaratmaq üçün kifayət etmir. Müharibənin gedişatı daha çox tərəflərin canlı qüvvə ehtiyatlarından, sursat istehsalından, Qərbin Ukraynaya hərbi dəstəyinin davamlılığından və cəbhədə əldə olunan taktiki nəticələrdən asılıdır.
Əgər Ukrayna bu tip yüksək dəqiqlikli zərbələri sistemli şəkildə davam etdirə, hava hücumundan müdafiə şəbəkəsini, logistika mərkəzlərini və hərbi infrastrukturu ardıcıl hədəfə ala bilsə, bu, Rusiyanın hücum imkanlarını tədricən zəiflədə və müharibənin dinamikasına təsir göstərə bilər. Lakin hazırkı mərhələdə bunu müharibənin taleyini dəyişəcək həlledici amil kimi qiymətləndirməkdən daha çox, Rusiyaya hərbi və iqtisadi təzyiqi artıran mühüm taktiki uğurlar kimi dəyərləndirmək daha doğru olar".
Turqut Ansari
18:00 07.07.2026
Oxunuş sayı: 59
