Azərbaycan Respublikası ən etibarlı tərəfdaşdır
Ölkə başçısı Cənab İlham Əliyev dekabrın 17-də Rusiyanın “Rossiya Seqodnya” Beynəlxalq İnformasiya Agentliyinə müsahibəsində bir çox tezis xarakterli mesajlar verdi. Onlardan ən vacibi Azərbaycan Respublikasının gələcəkdə baş verə biləcək münaqişələrdə gərginliyin aradan qaldırılmasında öz töhfəsini verə biləcəyi oldu. Azərbaycanın Rusiya ilə müttəfiqlikdə öz öhdəliklərinə maksimum dərəcədə məsuliyyətlə yanaşması Yer üzündəki real vəziyyətdən çıxış etməsinə maneə deyildir. Məhz bu səbəbdən də ölkə rəhbəri Cənab İlham Əliyev iki qütbün – Rusiyanın və ABŞ-nin hərbi rəhbərliyinin Bakıda görüşməsi faktını dilə gətirərək Azərbaycan Respublikasının etibarlı tərəfdaş olmasını vurğuladı.
Müsahibədə verilən digər mesaj isə Azərbaycan Respublikasının istər Qərbdə, istərsə də Şərqdə xarici siyasət yeritməsində tamamilə müstəqil olmasıdır. Bu gün dünyada müvazinətlərin tamamilə dəyişdiyi bir dövrdə Azərbaycan həm Rusiya ilə, həm də NATO üzvü olan Türkiyə ilə müttəfiqliyi olan yeganə ölkə kimi özünün lazım bildiyi sahələrdə çoxşaxəli münasibətlərini qurub. Siyasi icmalçının Türkiyə ilə müttəfiqliyin və hərbi əməkdaşlığın xarakterinə ehtiva edən sualına Cənab İlham Əliyevin prinsipial xarakterli cavabı gecikmədi. Burada prinsipiallıq nədir? Azərbaycan dövlətinin Türkiyə ilə hərbi əməkdaşlığı 30 illik tarixə malikdır, lakin hərbi bazaların yaradılmasına ehtiyac duyulmur. İkinci Qarabağ müharibəsində Azərbaycan Silahlı Qüvvələrinin döyüş qabiliyyətinin, hərbi hazırlığının, hərbi-texnoloji təchizatının hansı səviyyədə olduğu nəinki düşmənlərə, bütün beynəlxalq ictimaiyyətə bəlli oldu. Türkiyənin hərbi strukturları ilə əməkdaşlıq, Azərbaycan Ordusunun müasirləşdirilməsində, döyüş qabiliyyətinin artırılmasında qardaş dövlətin köməyi danılmazdır. Müharibədən sonra iki qardaş dövlət arasında qəbul edilmiş Müttəfiqlik haqqında Bəyannamədə məhz iki dövlətdən birinə təhlükə və ya təcavüz zamanı qarşılıqlı hərbi yardım göstərməyi nəzərdə tutur. Bu səbəbdən də hər hansı daimi bazanın yaradılması lüzumsuz hesab edilir.
Dünyanın yeni siyasi simasında Azərbaycan dövləti hər zaman olduğu kimi etibarlı tərəfdaş kimi çıxış edir. Ümumən Qafqazda sabitliyin təminatçısı kimi çıxış edən Azərbaycan Respublikası öz prinsipiallığı ilə siyasi dəngələri sülh naminə yönəltməyi bacaracaqdır.
Leyla Hüseynova
YAP Yasamal rayon AMEA A.A.Bakıxanov adına Tarix və Etnologiya İnstitutu üzrə ərazi partiya təşkilatının sədr müavini
13:13 21.12.2024
Oxunuş sayı: 21754
