Azərbaycan və Avropa Komissiyası arasında yeni əməkdaşlıq perspektivləri formalaşır
Azərbaycan ilə Avropa İttifaqı arasında iqtisadi və ticarət əməkdaşlığı son illərdə strateji tərəfdaşlıq səviyyəsinə yüksəlib. Enerji ixracı, nəqliyyat-kommunikasiya layihələri, investisiya əməkdaşlığı və Orta Dəhlizin artan əhəmiyyəti tərəflər arasında ticarət əlaqələrinin davamlı şəkildə genişlənməsinə şərait yaradıb. Prezident İlham Əliyevin Avropa Komissiyasının Prezidenti Ursula Fon der Lyayenlə mətbuata birgə bəyanatında qeyd etdiyi “Avropa İttifaqı üçün Azərbaycan Cənubi Qafqazda əsas ticarət tərəfdaşıdır” fikri də bu əməkdaşlığın miqyasını və ölkəmizin regionun iqtisadi xəritəsində tutduğu mövqeyi əks etdirir. Bəs hazırda Avropa İttifaqı ilə Azərbaycan arasında ticarət münasibətlərini necə qiymətləndirmək olar? Azərbaycanı Avropa İttifaqının Cənubi Qafqazdakı əsas ticarət tərəfdaşına çevirən əsas amillər hansılardır?
Mövzu ilə bağlı Milli Məclisin deputatı Vüqar Bayramov Crossmedia.az-a açıqlama verib: “Avropa İttifaqı uzun illərdir ki, Azərbaycanın əsas ticarət tərəfdaşıdır. Nəzərə alsaq ki, bir tərəfdən Avropa İttifaqının Azərbaycanın ixracında payı hər zaman yüksək olub və ümumi ixracın 50 faizindən çoxunu təşkil edib, eyni zamanda ümumi ticarət dövriyyəsinin də təxminən yarısı məhz Avropa İttifaqının payına düşüb. Bu, ilk növbədə onunla bağlıdır ki, Azərbaycan xam neftini və təbii qazını əsasən Avropa İttifaqı ölkələrinə ixrac edir. Bu da təbii olaraq ümumi ixrac göstəricilərinə ciddi təsir göstərir. Nəzərə alsaq ki, təbii qazın əsas ixrac istiqaməti İtaliyadır, eyni zamanda Azərbaycan xam neftini də İtaliya başda olmaqla Avropa İttifaqının digər ölkələrinə göndərir. Hazırda Azərbaycan 16 ölkəyə təbii qaz ixrac edir. Onlardan 12-si Avropa ölkəsi, 10-u isə Avropa İttifaqına üzv dövlətlərdir. Bu göstəricilər bir daha təsdiq edir ki, Avropa İttifaqı Azərbaycanın ən böyük enerji tərəfdaşıdır. Xüsusilə nəzərə alsaq ki, 2020-ci ilin dekabr ayının sonundan etibarən Azərbaycan Avropa İttifaqına 60 milyard kubmetrə yaxın təbii qaz ixrac edib. Bu baxımdan enerji tərəfdaşlığı ümumi ticarət dövriyyəsinə də birbaşa təsir göstərir və Avropa İttifaqının Azərbaycanın xarici ticarətində payı yüksək olaraq qalır”.
Deputat əlavə edib ki, son səfər və Azərbaycan Prezidenti ilə Avropa Komissiyasının rəhbərliyi tərəfindən verilən açıqlamalar tərəflər arasında münasibətlərin daha da dərinləşdirilməsi və yeni əməkdaşlıq perspektivlərinin yaradılmasının əsas hədəflərdən biri olduğunu göstərir: “Azərbaycan etibarlı tərəfdaş olduğunu dəfələrlə nümayiş etdirib və Avropa İttifaqı ilə əməkdaşlığı yalnız enerji sahəsində deyil, qeyri-enerji istiqamətlərində də genişləndirmək niyyətindədir. Bu baxımdan, mətbuata verilən bəyanatlarda da Prezidentin diqqət çəkdiyi əsas məqamlardan biri nəqliyyat və logistika sahəsində əməkdaşlığın genişləndirilməsi idi. Məhz nəqliyyat və kommunikasiya istiqamətində Avropa İttifaqı ilə yeni əməkdaşlıq imkanları mövcuddur. Eyni zamanda Azərbaycanın iqtisadi potensialının artırılması, Azərbaycan məhsullarının Avropa bazarlarına daha geniş çıxış imkanlarının yaradılması, eləcə də ölkəmizdən daşınan yüklərlə bağlı mövcud məhdudiyyətlərin aradan qaldırılması Azərbaycanın etibarlılığını və öhdəliklərinə sadiqliyini bir daha nümayiş etdirir. Azərbaycan bu istiqamətdə mövqeyini açıq şəkildə ifadə edir və növbəti dövrlərdə də dayanıqlı inkişafın təmin olunması məqsədilə səylərini və təşəbbüslərini artıracaq. Cənab Prezidentin də qeyd etdiyi kimi, regionda yeni düzən formalaşır və bu yeni düzən təkcə Azərbaycan üçün deyil, bütövlükdə region üçün daha geniş iqtisadi imkanlar, sülh və əməkdaşlıq perspektivləri vəd edir”.
Ayhan
13:00 03.07.2026
Oxunuş sayı: 54
