ABŞ və NATO-nun yeni əməkdaşlığı - Hərbi baza yaradılır
Polşa və ABŞ Amerika hərbi bazasının yerləşdirilməsi ilə bağlı danışıqların növbəti mərhələsinə keçiblər. Polşanın milli müdafiə naziri Vladislav Kosiniyak-Kamışın verdiyi məlumata görə, ölkə vətəndaşlarının təxminən 60%-i Polşada daimi Amerika bazasının yaradılmasını dəstəkləyir: "Pentaqon hazırda sonrakı qərarlar üçün əsas təşkil edəcək qüvvələrin nəzərdən keçirilməsini həyata keçirir". Maraqlıdır yaradılan yeni hərbi baza hansı məqsədə xidmət edəcək?
Bundan əvvəl Polşanın Baş naziri Donald Tusk hökumətin ölkə ərazisində daimi ABŞ hərbi bazasının yaradılması üçün şərtləri hazırlamaq məqsədilə qətnamə qəbul edəcəyini açıqlamışdı.
Mövzu ilə bağlı Crossmedia.az-a danışan politoloq Zeynal Əmrəliyev bildirib ki, ABŞ-ın Polşada hərbi mövcudluğunu gücləndirmək istəyi Rusiyanın son dövrlərdə Avropa istiqamətində artan hərbi aktivliyi ilə bağlıdır.
Onun sözlərinə görə, son vaxtlar Rusiyanın Polşanın hava məkanını pozması və sərhəd bölgələrində artan gərginlik Vaşinqtonu əlavə təhlükəsizlik tədbirləri görməyə vadar edib: "ABŞ Polşada hərbi baza yerləşdirərək həm Avropanın təhlükəsizliyini gücləndirmək, həm də Polşanın indiki hökumətinə dəstək vermək istəyir. Bununla Vaşinqton və Varşava arasında hərbi əməkdaşlıq daha da möhkəmlənəcək. Bu addım ilk növbədə NATO-nun şərq cinahının müdafiəsini gücləndirmək məqsədi daşıyır. ABŞ bununla göstərmək istəyir ki, Avropanın təhlükəsizliyi hələ də onun təminatı altındadır. Vaşinqton hesab edir ki, ABŞ olmasa, Avropa Rusiya qarşısında daha həssas vəziyyətdə qala bilər. Bu mesaj təkcə hərbi deyil, həm də siyasi və iqtisadi baxımdan Avropa ölkələrinə ünvanlanıb".
Z.Əmrəliyev əlavə edib ki, Polşa ABŞ üçün NATO çərçivəsindən kənarda da mühüm strateji tərəfdaşlardan biridir: "Polşanın coğrafi mövqeyi Rusiyaya qarşı manevr imkanlarını genişləndirir. Bundan əlavə, Polşa ilə Rusiya arasında tarixi rəqabət də mövcuddur. Bu baxımdan ABŞ-ın Polşa ilə münasibətlərini daha da gücləndirməsi başadüşüləndir".
Zeynəb Həsən
14:45 29.06.2026
Oxunuş sayı: 53
