Türk kinosunun ruhu Bakıda canlandı: unudulmaz film musiqiləri bir səhnədə
Rəşid Behbudov adına Mahnı Teatrının səhnəsi bir axşam türk kinosunun xatirələrinə çevrildi. Tamaşaçılara nostalji və duyğusal anlar yaşadan “Türk film musiqisi gecəsi” adlı tədbir keçirilib. Gecə türk ekran sənətinin yaddaşlara hopmuş musiqiləri ilə unudulmaz oldu.
Tədbir “Möhtəşəm Yüzyıl” serialının əzəmətli musiqisi ilə qapılarını açdı. Sanki tarixin pərdəsi aralandı, səhnə Osmanlı sarayının rüzgarını zala daşıdı. Daha sonra aparıcı səhnəyə çıxaraq gecənin proqramını və səslənəcək əsərlərin hekayəsini tamaşaçı ilə bölüşdü.
Dirijor Ellada Məmmədovanın zərif, amma qətiyyətli rəhbərliyi altında orkestr türk kino və serial tarixinə adını yazdırmış əsərləri diriltdi. Alətlərin səsi ilə illər danışdı. Gecə boyunca “Hercai”nin eşq fırtınası, “Arım Balım Pətəyim”in şirin lirizmi, “Aşk-ı Memnu”nun qadağan sevdası, “Kara Sevda”nın ağrılı nəğməsi, “Hababam Sınıfı”nın gülüş dolu sədaları səsləndi. Zal “Diriliş Ertuğrul”un döyüş ruhu ilə alovlandı, “Öyle Bir Geçer Zaman Ki”nin kədəri ilə susdu, “Çalıkuşu”nun həsrəti ilə kövrəldi. “Arka Sokaklar”ın gərginliyi, “Bir Zamanlar Çukurova”nın taleyi, “Kurtlar Vadisi”nin sərt ritmi və “Yalı Çapkını”nın müasir nəfəsi də musiqinin dili ilə yenidən yaşandı.
Proqrama solistlərin ifaları xüsusi rəng qatdı. Rövşən Qəhrəmanov “Haziran Gecesi”ni səmimi həzinliklə oxudu. Ayşən Mehdiyeva “Issız Adam” filmindən musiqini kədərli bir etirafa çevirdi. Aysel Hüseynzadənin ifasında “Söyle Buludum” mahnısı isə səhnədən buludlara, buludlardan ürəklərə yol tapdı.
Gecənin ən incə toxunuşlarından biri aparıcının hər musiqidən əvvəl həmin filmin və ya serialın süjetini, obrazlarının taleyini və tamaşaçı yaddaşında qoyduğu izləri qısaca xatırlatması oldu. Bu sözlərdən sonra orkestr notları ilə filmin ab-havasını bərpa etdi. Zal sanki ekrandakı kadrlara qayıtdı - kimisi sevginin, kimisi ayrılığın, kimisi mübarizənin içində tapdı özünü.
Sonda təşkilatçılar tamaşaçılara minnətdarlıqlarını bildirdilər. Uzun sürən alqışlarla başa çatan gecə türk kinosunun unudulmaz musiqilərini bir araya gətirdi. Rəşid Behbudov adına Mahnı Teatrı bir axşam boyunca sənətin, xatirənin və musiqinin qovuşduğu məkana çevrildi.
Nigar Xəlilli
12:40 19.06.2026
Oxunuş sayı: 51
